आः मेमेगु नखःचखःया इलय् नं न्हूगु नोट हिले फइगु

येँ – मोहनिया इलय् जक न्हूगु नोट हिला वयाच्वंपिं नेपाःमितय्सं आः मेमेगु नखःचखःया इलय् नं उकथं हे न्हूगु नोट सटही याये खनीगु जूगु दु । नेपाल राष्ट्र बैंकं आवंलि मेमेगु जनजाति व भाषाभाषीं न्यायेकीगु नखःचखःया इलय् नं न्हूगु नोट सटही याये फइगु व्यवस्था याःगु खः ।

थ्व स्वयां न्ह्यः मोहनिया इलय् जक तःधंगु परिमाणय् न्हूगु सटही यायेगु व्यवस्था याना वयाच्वंगु नेपाल राष्ट्र बैंकं आः समावेशिताया नियम लागू यासें थुकथंया व्यवस्था यायेत्यंगु खः ।

राष्ट्र बैंकया मुद्रा व्यवस्थापन विभागयाकथं आवंलि मोहनि बाहेकं स्वांयाःपुन्हि, सापारु, येँयाः, स्वन्ति, यःमरिपुन्हि, पाहांचः¥हे, होलिपुन्हि, इद, उभौलि पर्व, गौरा पर्व, तीज, संविधान व गणतन्त्र दिवस, जितिया पर्व, फाल्गुनन्द जयन्ती, गुरु नानक जयन्ती, उधौली पर्व थेंज्याःगु राष्ट्रिय नखः व दिवसया इलय् नं न्हूगु नोट सटही याये फइगु व्यवस्था याःगु खः ।

थीथी जनजाति व भाषाभाषीतय्सं हनीगु थीथीकथंया नखःचखः व राष्ट्रिय दिवसय् नं न्हूगु नोट सटही याये फइगु सुविधा बीगु विभागं न्ह्यथंगु दु । थुपिं नोट राष्ट्र बैंकया थापाथलीइ च्वंगु ज्याकू नापं स्वनिगः पिनेया विराटनगर, पोखरा, धनगढी, सिद्धार्थनगर, जनकपर, वीरगंज लगायतया ज्याकुथिं नं न्हूगु नोट हिले फइगु व्यवस्था मिले यानागु राष्ट्र बैंकं न्ह्यथंगु दु ।