शेयरया पुँजीगत लाभकरय् सहमति

येँ – शेयर कारोवारय् पुँजीगत लाभकरयात कयाः जुयाच्वंगु विवाद क्वचाःगु दु । अर्थ मन्त्रालयय् बुधवाः जूगु सर्वपक्षीय भेला लिपा थ्व विवाद क्वचाःगु खः । सवपक्षीय भेलाय् अर्थ मन्त्रालय २०५८ साल निसें २०७६ असार मसान्त तक जूगु कारोवारया औसत भाः पिकयाः लागत मूल्य क्वःछिइगु सहमति जुइवं लाभकरया विवाद क्वचाःगु खः ।

लगानीकर्तातय्सं ताःई न्ह्यवनिसें २०५८ साल निसें वंगु असार मसान्त तकया औसत भाः पिकया लागत मूल्य क्वःछित माग याना वयाच्वंगु खः । थ्व हे मागय् अर्थ मन्त्रालयं नं सहमति प्वंकूगु खः । थ्व सहमति कथं आः २०५८ साल निसें २०७६ असार तक जूगु कारोवार दकलय् अधिकतम व दकलय् न्यूनतम भाःया आधारय् औसत मू निर्धारण याइ ।

असार तकया दुने मिउगु शेयरया लागत आः क्वःछिउगु औसत मू स्वयां म्हो जुल धाःसा लाभकर पुलेमाली मखु ।

अले थ्व हे आधारय् पुँजीगत लाभकरया गणना जुइ । थ्व सहमति लिपा असार तकया दुने मिउगु शेयरया लागत आः क्वःछिउगु औसत मू स्वयां म्हो जुल धाःसा लाभकर पुलेमाली मखु । असार लिपा जूगु कारोवारय् धाःसा वास्तविक भावय् हे कर निर्धारण जुइ । थ्व सहमतिया निंतिं अर्थमन्त्रालयं सिंहदरबारय् हे सर्वपक्षीय भेला तःगु खः ।

अर्थ मन्त्रालयपाखें वित्तीय व्यवस्थापन महाशाखाया प्रमुख तोयम रायया नेतृत्वय् वार्ता जूगु खः । बैठकय् लगानीकर्तातय् न्यागुलिं संगठनया प्रतिनिधि लिसें नेपाल धितोपत्र बोर्ड, नेपाल स्टक एक्सचेञ्ज, आन्तरिक राजश्व कार्यालययाया प्रतिनिधिपिं नं दुथ्याःगु खः ।

थ्व सहमति लिपा मन्त्रालयं धितोपत्र बोर्डयात थ्व विधि कार्यान्वयनय् यंकेगु निंतिं निर्देशन नं बिउगु दु । आः धितोपत्र बोर्डं याकनं हे थःगु सञ्चालक समितिपाखें निर्णय याकाः कार्यान्वयनय् यंकी ।

सम्बन्धित बुखँ

LEAVE YOUR COMMENTS