प्राकृतिक विपदय् सीपिं आतक १९५ म्ह थ्यन

येँ – गृह मन्त्रालय अन्तर्गतया विपद् पूर्वा तयारी तथा प्रतिकार्य शाखाया कथं थुगुसी वंगु साउनया न्हापांगु वाःतकया दुने प्राकृतिक विपदय् लानाः देय्न्यंकं १९५ म्ह सीगु दु । शाखाया कथं खुसिबाः, चलः, डुबान, मलः जुयाः मिं नइगु घटना, वाफय् वयाः व सर्प न्यानाः सीपिं १९५ म्ह थ्यंगु दु ।

शाखां बिउगु जानकारीकथं देय्न्यंकं थुपिं सकतां झिंन्यासः स्वयां अप्वः घटना जूगु दु । शाखाया प्रमुख वेदनिधि खनालया कथं खुसिबालं ५५, मलः जुयाः ४४, चलखं ३४, मिं नयाः १३, जनावरया आक्रमणं गुम्ह, वाफय् वयाः च्याम्ह, तसकं वा वयाः न्हय्म्ह, हवाई दुर्घटनाय् स्वम्ह, सर्प न्यानाः खुम्ह व मेमेगु घटनाय् झिंखुम्ह सीगु दु ।

प्राकृतिक विपदय् लानाः सीपिनिगु थ्व तथ्यांकय् तराईया छुं छुं जिल्लाया विवरण धाःसा दुथ्याःगु मदुनि । तराईया छुट जूगु जिल्लाया विवरण वल धाःसा सीपिनिगु ल्याः अझ अप्वयेफुगु शाखां जानकारी बिउगु दु ।

थुकथं हे विपद्या घटना लानाः ३५ म्ह अझं वेपत्ता जुयाचवंगु दुसा करिब न्यासःम्ह घाःपाः जूगु दु । विपदं १२,९९० परिवार प्रभावित जूगु दुसा थुकी दकलय् अप्वः वाफय् वयाः प्रंभावित जूपिनिगु ल्याः १०,६९७ परिवार दु । अथे हे विपदय् लानाः ११७८ जनावर सीगु दु ।