मानवअधिकार संरक्षणय् नेपाल प्रहरी

येँ – नेपाल प्रहरीं मानवअधिकार संरक्षणया सम्बन्धय् थःपिनिगु सक्रियता क्यना हःगु दु । आम नागरिकलिसें प्रत्यक्ष सरोकार तइगु निकाय नेपाल प्रहरीं विशेष यानाः बन्द, हडताल, विरोध, धर्ना, जुलुसलिसें हुल नियन्त्रण व मेमेगु अवाञ्छित गतिविधि नियन्त्रण यायेगु याइ । थज्याःगु अवस्थाय् सुरक्षा निकाय गबलें गबलें कठोर जुइबलय् मानवअधिकार हनन् जूगु खँ चर्चा वयेगु याः ।

नेपाल प्रहरीं थज्याःगु अवस्थाय् आः वयाः मानवअधिकार संरक्षणय् विशेष ध्यान बीगु यानाहःगु दु । नेपाल प्रहरींं थुकियात नं अभियानया रुपय् हे कया हःगु प्रहरी प्रधान ज्याकुथिं न्ह्यथंगु दु । नेपाल प्रहरीं जारी याःगु छगू विज्ञप्तीइ मानवअधिकारया सवालयात नेपाल प्रहरीं शुन्य सहनशीलता नालाकाःगु खँ न्ह्यथनातःगु दु ।

प्रहरी महानिरीक्षाक सर्वेन्द्र खनालया प्राथमिकतामध्ये प्रमुख विषय मानवअधिकार संरक्षण व उकिया प्रवद्र्धन जूगु खँ विज्ञप्तीइ धयातःगु दु । प्रहरी महानिरीक्षक खनालया हे निर्देशनय् नेपाल प्रहरीं लिपांगु इलय् मानवअधिकार सम्बन्धी छगू बिस्कं रणनीतिक योजना दयेकाः कार्यान्वयनय् हःगु दु ।

लिपांगु इलय् मिसा, मिजं व मस्तय् निंतिं बिस्कं बिस्कं हिरासत कक्षया व्यवस्था याःगु नेपाल प्रहरीं थीथी सेलया नं गठन यानाः मानवअधिकार उल्लंघन जूगु दु–मदु धइगु बारे नं अनुगमन यायेगु यानाहःगु दु । हिरासतय् सीसीटिभी क्यामरा तकं जडान यानाः मानवअधिकारया गतिविधियात ध्यान बिया वयाच्वंगु नेपाल प्रहरी मिसा व मस्तय् निंतिं बिस्कं डेस्कया स्थापना यानाः नं मानवअधिकारयात ध्यान बिया वयाच्वंगु दु ।

प्रहरी वरिष्ठ उपरीक्षक नापं नेपाल प्रहरीया प्रवत्तला उत्तमराज सुवेदीं राष्ट्रिय मापदण्ड व संविधानं ग्यारेन्टी याःगु मानवअधिकार संरक्षण व प्रवद्र्धनय् नेपाल प्रहरी महत्वया लिसें न्ह्याः वनाच्वंगु धयादीगु दु ।

सम्बन्धित बुखँ

LEAVE YOUR COMMENTS