पेट्रोलया ध्यबा मपूगुलिं मयुरया बस ज्वन

येँ नं निसें बनेपा थ्यंकया रुटय् गाडी चले यानाच्वंगु मयुर यातायातया बसयात ध्यबा मपूगुलिं छगू पेट्रोल पम्पं ज्वनाबिउगु दु । यातायात समितिया सिन्डिकेट त्वाःथलेगु झ्वलय् तसकं बय्बय् जूगु मयुर यातायातय् आः धाःसा व्यवस्थापनय् समस्या वयाः पेट्रोलया ध्यबा तकं पुलेमफुगु अवस्था वःगु खः ।

मयुरया बसय् पेट्रोल तया वयाच्वंगु स्वयम्भूइ च्वंगु हामा पेट्रोलं छगः बस ज्वंगु खः । मयुरं थ्व पेट्रोल पम्पयात जक झिंखुगू लाख ध्यबा पुलेमानीगु खँ धाःगु दु । हामां मयुरया बा ५ ख १५३७ नम्बरया बसयात ज्वनातःगु खः । हामां मयुरया ४४ गः बसय् पेट्रोल जायेकेगु यानाच्वंगु खः ।

मयुर यातायातय् वःगु व्यवस्थापकीय समस्यां यानाः थुगु कम्पनीं बैंकया किस्ता व गाडीया ध्यबा नं पुले मफयाच्वंगु खँ धाःगु दु । गाडीया ध्यबा पूवंक मपुगुलिं गाडी मिउगु सिप्रडी ट्रेडिङ्गं नं गुंगः गाडी ज्वंगु खँँ धाःगु दु । सिप्रडीं बस मर्मतया ध्यबा मपूगुलिं बस ज्वनेमाःगु खँ धाःगु दु ।

मयुरं थप बस न्यायेगु धकाः माछापुच्छ«े बैंकं न्यागू करोड त्यासा काःगुया नं किस्ता पुले मफयाच्वंगु सीदुगु दु । किस्ता मपूगुलिं माछापुच्छ«ें नं किस्ता पुलेत ताकेता यानाच्वंगु दु । मयुर यातायात गैरआवासीय नेपालीतय्सं लगानी यानातःगु दु । यात्रुतय्सं नं मयुरया बस ययेकाच्वंगु खःसां कम्पनीया व्यवस्थापन बांमलाःगुलिं यानाः समस्याय् वःगु खँ धाःगु दु ।