भिक्षु महासंघ व देय् दबूपाखें भत्सर्ना

येँ – अखिल नेपाल भिक्षु महासंघं रुपन्देही लँया सिथय् तयातःगु बुद्धया मूर्ति स्यंकातःगु ज्यां शान्तिगामी सकसियां आस्थाय् घाः लाकूगु खँ धाःगु दु । रुपन्देहीया बुटवल बेलहिया सडक खण्ड अन्तर्गत तिलोत्तमा नगरपालिकाया शंकर नगर चोक निसें नयाँ मिल तकया ६ लेन सतकय् तयातःगु बुद्धया मूर्तियात म्हीग चान्हय् तोडफोड याना तःगु खः । अन तयातःगु न्यागू मूर्ति तोडफोड यानाः वांछ्वया तःगु खः ।

महासंघं छगू वक्तव्य पितबिसें बुद्धया पवित्र जन्मभूमिइ परिसरय् हिंसात्मक गतिविधिसहित अशान्ति न्यंकेगु निकृष्ट ज्यां सकसितं स्तब्ध याःगु खँ धासें थज्याःगु ज्यां धर्मनिरपेक्ष देय् नेपाःया धार्मिक आस्थाय् हे खलल याइगु बदनियतपूर्ण ज्या नगारिकतय् मौलिक हकहित व अधिकारय् ठेस लाकेगु ज्या याःगु खँ धाःगु दु ।

महासंघं धार्मिक आस्थाय् चोट लाइकथं बुद्धया मूर्ति तोडफोड यायेगु ज्यां आपसी सौहार्दता स्यनीगु सुनिश्चित दु धासें थज्याःगु ज्या याःपिं दोषीत तुरुन्त पत्ता लगे यानाः कानुनी दायराय् हयेत सरकारया ध्यनाकर्षण नं याःगु दु ।