काेराेना महामारी लिसे ल्वायेत नेपाः असफल – एम्नेष्टी
येँ (नेपालभाषा टाइम्स)÷ मानव अधिकारवादी संस्था एमनेष्टी इन्टरनेशनलं नेपाः कोरोना भाइरसया निगूगु लहर लिसे ल्वाये असफल जूगु खँ धाःगु दु । एम्नेष्टी इन्टरनेशनलं वंगु अप्रिल २९ निसें मे २ तक प्यन्हु कोरोना नियन्त्रण निंतिं जूगु कुतः व जनस्वास्थ्य संरचनां फयेमाःगु हाथ्या बारे अध्ययन यानाः छगू प्रतिवेदन पिकाःगु खः ।
‘सासः ल्हायेत संघर्ष यासें ः नेपालय् कोभिड १९ या निगूगु लहर’ नामं पिथँगु उगु प्रतिवेदनय् सरकार व दलत राजनीतिक ‘खिचातानी’इ व्यस्त जूगु व कोरोना लिसे ल्वायेत असफल जूगु खँ न्ह्यथनातःगु दु । प्रतिवेदन सरकार व दलतय्त आः वइगु इलय् जीवन रक्षाया निंतिं निर्णायक पलाः ल्ह्वनेमाःगु सुझाव नं बियातःगु दु ।
प्रतिवेदनय् नेपाःया स्वास्थ्इ संरचना हे महामारी फयेफइगु अवस्थाय् मदुगु व उकीसनं सरकारया कमजोर तयारी यानाः यक्व मनूतय् ज्यान वंगु खँ न्ह्यथँसे स्वास्थ्य क्षेत्रय् नेपाःया असफलता न्ह्यथनातःगु दु ।
अथेहे राजनीतिक नेतृत्वय् असंवेदनशीलतां व प्रशासनिक झन्झटं यानाः नं समस्या तच्वःगु एम्नेष्टीया निष्कर्ष दु ।
एम्नेष्टी एशिया प्यासिफिकया निर्देशक यामिनी मिश्रं अझ नं नेपाःया सरकारी अधिकारीत निष्क्रिय दुगु व प्रशासनिक झन्झटया कारणं दिनाच्वंगु अक्सिजन आपूर्ति व खोप न्यायेगु प्रक्रिया याकनं न्ह्याकेमाःगु खँ धयादीगु दु ।
एम्नेष्टी नेपालया निर्देशक निरञ्जन थपलियां अझ नं सरकार व राजनीतिक दलतय् प्रथामिकता नयेमखनाः सीत्यंपिं जनताया रक्षा यायेगु स्वयां नं राजनीतिक मुद्दाय् हे लानाच्वंगु खँ धयादीगु दु ।
प्रतिवेदनय् थगुने जूगु न्हापांगु लकडाउन निसें हे सीमान्तकृत समुदायं तच्वःगु विभेद फये मालाच्वंगु व जातीय विभेदया घटना नं अप्वःगु तथ्यांक न्ह्यब्वयादीगु दु । पहुँच दुपिं व धनीपिंसं जक अक्सिजन व अस्पतालय् उपचार चूलाकाच्वंगुलिं सीमान्तकृत समुदायं थप जोखिमय् लाःगु प्रतिवेदनय् उल्लेख दु ।
अथेहे सरकारया नेतृत्वय् च्वनाच्वंपिंसं हे कोभिड १८ सम्बन्धी गलत सुचं बियाच्वंगुलिं मनूतय् ज्यान तकं जोखिम लानाच्वंगु खँ नं न्ह्यथनातःगु दु । प्रधानमन्त्री केपी ओलीं हे पालु, हलु व लाभा नलकि भाइरसलिसे ल्वायेगु क्षमता अप्वइगु धकाः जनतायात भ्रमित याःगु लिसें वरिष्ठ नेतातय्सं हे सामाजिक दूरीसम्बन्धी मापदण्डयात बेवास्ता याःगु प्रतिवेदनय् न्ह्यथनातःगु खः ।
प्रधानमन्त्री ओली न्हापा नेपालीतय्के ल्वय् लिसे ल्वायेगु प्रतिरोधी क्षमता हे अप्वः दु धकाः तकं धायेगु यानाच्वंगु खःसा कोरोनाया निगूगु लहर वयेधुंकाः धाःसा भाइरस लिसे ल्वायेगु प्रतिरोधी क्षमता गाक्क मदुगु थःम्हं वाःचाःगु धयादीगु दु ।
प्रतिवेदनय् नेपालया महामारी नियन्त्रण यायेत अन्तर्राष्ट्रिय समुदायं हे आर्थिक व प्राविधिक ग्वाहालि अप्वयेकेमाःगु खँ धयातःगु दु । अथेहे धनी देय्तय्सं खोप मुंकातःगु दुर्भाग्यपूर्ण अवस्था दुगु धासें सकसितं समानुपातिक ढंगं खोप बीत अन्तर्राष्ट्रिय समुदायं ध्यान बीमाःगु खँ प्रतिवेदनय् धयातःगु दु ।
तर सरकारी अधिकारीत धाःसा एम्नेष्टीं धाः थे असफल जूगु स्वीकार यायेत धाःसा तयार खनेमदु । स्वास्थ्य मन्त्रालयया सहप्रवक्ता समिरकुमारी अधिकारीं नेपाःया स्वास्थ्य संरचना हे असफल जूगु धयागु खँय् थः सहमत मदु, बरु समन्वयय् छुं समस्या धाःसा खनेदुगु खः धकाः धयादीगु दु ।
LEAVE YOUR COMMENTS