न्यायिक समिति राष्ट्रिय मञ्च तदर्थ समिति गठन

येँ(नेपालभाषा टाइम्स)- येँ महानगरपालिकाया उपप्रमुख सुनिता डंगोलया संयोजकत्वय् न्यायिक समिति राष्ट्रिय मञ्च तदर्थ समिति गठन याःगु दु । येँ महानगरपालिका न्यायिक समितिया संयोजक तकं जुयाच्वनादीम्ह उपप्रमुख डंगोलया संयोजकत्वय् उगु तदर्थ समिति गठन याःगु खः ।

वंगु चैत १५ व १६ निन्हुयंकं नेपाल प्रज्ञा प्रतिष्ठानय् जूगु न्हापांगु न्यायिक समिति राष्ट्रिय सम्मेलनया समापनया झ्वलय् उपप्रमुख डंगोलया संयोजकत्वय् तदर्थ समिति गठन याःगु खः । सम्मेलनया लिपांगु न्हि ११ गू बुँदाया येँ घोषणापत्र जारी यायेगु झ्वलय् तदर्थ समिति नं गठनया प्रस्ताव सम्मेलन मूल समारोह समितिया संयोजकलिसें येँ महानगर उपप्रमुख डंगोल स्वयमं तयादीगु खः ।

नीछम्हेसिया न्यायिक समिति राष्ट्रिय मञ्चयात लछिया दुने पदाधिकारीहित पूर्णता बीगु नापं थुकिया दर्ता येँ जिल्लाय् यायेगु निर्णय नं उगु सम्मेलनं सर्वसम्मत रुपं याःगु खः ।

न्यायिक समितिया ज्यायात व्यवस्थित, प्रभावकारी, गुणात्मक रुपं न्ह्यःने यंकेत देय्न्यंकंया स्थानीय तहय् दुगु न्यायिक समितिया पदाधिकारी दथुइ निरन्तर रुपं स्वापू तयाच्वनेत, समन्वय व संचार यायेत मञ्च गठन याःगु दु । मञ्चया ज्यायात अझ प्रभावकारी यायेगु ल्याखं राष्ट्रिय, प्रदेश व जिल्लास्तरय् नं सांगठनिक संरचना विस्तार याइगु जूगु दु ।

प्रदेशस्तरीय संरचनाय् अध्यक्ष, सचिव कोषाध्यक्ष छम्ह छम्ह यानाः च्याम्ह व जिल्ला समितिइ अध्यक्ष, उपाध्यक्ष, सचिव व कोषाध्यक्ष दइ । पदाधिकारीइ प्रतिनिधिच्व मजूगु जिल्लाया दक्वं स्थानीय तहया न्यायिक समितिया संयोजक वा सदस्य मञ्चया दुजः जुइगु व्यवस्था याःगु दु ।

सम्बन्धित बुखँ

LEAVE YOUR COMMENTS