मोहनि खर्च क्वपालेगु प्रस्तावय् सेवा निवृत्त कर्मचारीतय् विरोध

येँ – नेपाल राष्ट्रिय निवृत्त कर्मचारी संघं प्रतिनिधिसभाया राज्य व्यवस्था व सुशासन समितिइ सेवा निवृत्त जुइधुंकूपिं कर्मचारीतय्त बिया वयाच्वंगु मोहनि खर्च क्वपालेगु प्रस्तावयात कयाः विरोध याःगु दु ।

संघं छगू विज्ञप्ती जारी यासें थ्व सम्बन्धय् समिति दुथ्याःपिं सांसदतय्सं मोहनि खर्च क्वपालेमाः धकाः तःगु प्रस्ताव तःगु खँय् दुःख प्वंकूगु दु । राष्ट्रसेवक कर्मचारी व वयागुपाखें आश्रित परिवारया दुजःपिनिगु तकं भोटं निर्वाचित जुया वःपिं सांसदतय्सं झन् सहुलियत अप्वयेकेमाःगु थासय अःखबतं दुगु सुविधायात नं क्वपालेगु धकाः हःगु प्रस्तावयात विरोध याःगु दु ।

संघया अध्यक्ष गेहेन्द्रमान अमात्यं ल्हाःचिं तयाः पिथंगु विज्ञप्तीइ वर्तमान सरकारया ‘समृद्ध नेपाल, सुखी नेपाली’या नारा अःखः उकियात पंगः जुइकथंया ज्या राज्यसत्तापाखें जुइ मजिउ धासें सरकारया थ्व परिकल्पनायात मूर्त रुप बीत राष्ट्रसेवक कर्मचारीतय्गु जोश व जाँगरयाततक लिच्वः लाये फइगु खँ धयातःगु दु ।

नेपाली सेना, जनपद प्रहरी, सशस्त्र प्रहरी, निजामति कर्मचारी, विश्वविद्यालय, न्याय सेवा, शिक्षण संस्था, बैंक–वित्तीय संस्था, विभाग, प्राधिकरणपाखें सेवा निवृत्त जुयाः पेन्सन कया वयाच्वंपिं पूर्व राष्ट्रसेवकतय् उगु मंकाः संगठनं नखःचखःया इलय् बिया वयाच्वंगु खर्च कटौति मयायेत नं इनाप याःगु दु ।

प्रतिनिधिसभा राज्य व्यवस्था व सुशासन समितिइ नेकपाया सांसद जनार्दन शर्मां संघीय निजामति कर्मचारी सम्बन्धी विधेयकयात कयाः जूगु छलफलया इलय् उगु प्रस्ताव न्ह्यब्वयादीगु खः ।

प्रस्तावय् समिति दुने खर्च कटौति यायेगु व मयायेगु धइगु निगू पक्ष खने दयेवं पेन्सन कयाच्वंपिंत नखःचखःया इलय् बिया वयाच्वंगु खर्च बीगु वा क्वपालेगु धइगु विषयय् सामान्य प्रशासन मन्त्रालययात थःगु धारणा तयेत निर्देशन बिउगु दु । सामान्य प्रशासन मन्त्रालयया धारणा वयेधुंकाः जक थ्व सम्बन्धय् थप छलफल यायेगु समितिया सभापति शशी श्रेष्ठं कनादिल ।