खुसिबाः व चलखं तरकारीया भाः थहांवन

येँ – देय्या थाय्थासय् वःगु खुसिबाः व चलखं यानाः स्वनिगलय् तरकारीया भाः थहां वंगु दु । थुकिया लिसें विषादी परीक्षण सुरु जुइवं भारतीय तरकारी बांलाक मवःगुलिं नं तरकारीया भाः थहां वनाच्वंगु दु । कालिमाति तरकारी बजारय् हे तरकारीया भाः छगू किलोया ३० निसें ७० तका तक थहां वंगु खँ व्यापारीतय्सं धाःगु दु ।

मदिक्क वा वये न्ह्यव ५० तका किलोया थ्यनाच्वंगु लैं आः ७० तका थहां वनाः किलोया १२० तका थ्यनेधुंकूगु खः । अथेहे काउलीइ किलोय् ४० तका थहां वनाः सछि थ्यंगु दुसा ककःचा किलोय् ४० तका थहां वनाः ७० तका, भान्ताय् ३० तका थहां वनाः किलोया ८० तका थ्यंगु दु । अथेहे बन्दाय् ३० तका, तुसिइ ४० तका, भुतिइ ४० तका किलोय् थहां वंगु दु ।

आलु व प्याजया भाः धाःसा थहांकुहां मजूगु खँ व्यवसायीतय्सं धाःगु दु । तरकारीया लिसें सिसाबुसाया भाः नं थहां वंगु दु । कालिमाति तरकारी बजारय् खरबुजाय् २० तका, फुजी स्याउलय् ५० तका, माल्दँ अँ ४० तका, एभोकाडोय् १०० तका किलोय् भाः थहां वंगु दु । थ्व ल्याखं आः खरबुजा किलोया ६० तका, फुजी स्याउ ४०० तका, माल्दँ अँ १६० एभाकाडो ४५० तका थ्यंगु दु ।

खुसिबालं यानाः तरकारी उत्पादन जुइगु तराइया बुँ जलमग्न जुयाच्वंगु व चलः वनाः लँ बन्द जूगुलिं पहाडं वइगु तरकारी स्वनिगलं वयेमफुगुलिं बजारय् तरकारी म्हो जक वयाच्वंगु खँ कालिमातिया व्यापारीतय्सं धाःगु दु । अथेहे सर्वोच्च अदालतं भारतीय तरकारीयात विषादी परीक्षण यानाः जक नेपाः आयात यायेत आदेश बिउगुलिं नं भारतीय तरकारी न्हापां थें येँय् दुहां वये मफयाच्वंगु दु । थुकिं यानाः बजारय् तरकारी म्हो जक वयाच्वंगु दु ।

सम्बन्धित बुखँ

LEAVE YOUR COMMENTS