छन्हुं हे १७०म्हेसित कोरोना, संक्रमितत १२१२म्ह थ्यन

येँ – नेपालय् वंगु नीप्यघौया दुने थप १७०म्ह मनूतय्त कोरोना भाइरसया संक्रमण खनेदुगु दु । थीथी जिल्लाया प्रयोगशालाय् याःगु परीक्षणय् थप १७०म्हेसित कोरोनाया संक्रमण जूगु पुष्टि जूगु खः ।

स्वास्थ्य तथा जनसंख्या मन्त्रालयया कथं कोशी अस्पतालया प्रयोगशालाय् जूगु परीक्षणय् झापाया २७म्ह, धरानया बीपी कोइराला अस्पतालय् याःगु परीक्षणय् झापाया १म्ह व सप्तरीया ४म्ह, नारायणी अस्पतालया प्रयोगशालाय् बाराय् ४म्ह व पर्साया ५म्हेसित संक्रमण जूगु दु ।

अथेहे पाटन अस्पतालय् याःगु परीक्षणय् पाटन अस्पतालय् वासः याकाच्वम्ह सर्लाहीया १म्ह, गण्डकी अस्पताल प्रयोगशालाय् याःगु परीक्षणय् म्याग्दीया १म्ह, भेरीइ याःगु परीक्षणय् बाँकेया १० व भरतपुर अस्पतालया प्रयोगशालाय् याःगु परीक्षणय् कपिलवस्तुया ४म्ह व नवलपरासीया २म्हेसित संक्रमण जूगु दु ।

येँया टेकूइ च्वंगु राष्ट्रिय जनस्वास्थ्य प्रयोगशालाय् याःगु परीक्षणय् कपिलवस्तुया २३म्ह, रौतहटया ५६म्ह व सर्लाहीया ४म्हेसित संक्रमण जूगु दु । अथेहे रुपन्देहीया प्रादेशिक प्रयोगशालाय् याःगु परीक्षणय् कपिलवस्तु गौतबुद्ध मावि क्वारेन्टाइनय् १५म्ह व रुपन्देही सैनामैनाया १म्ह सहित १६म्ह संक्रमित जूगु दु ।

राप्ती स्वास्थ्य विज्ञान प्रतिष्ठानय् याःगु परीक्षणय् दाङया २म्ह व कपिलवस्तुया ९म्हेसित संक्रमण जूगु दु ।

नेपालय् कोरोना भाइरसया संक्रमण ५२ जिल्लाय् थ्यंगु दुसा कुल संक्रमिततय् ल्याः १ हजार २ सय १२म्ह थ्यंगु दु ।