नेवाः समुदायं यायेमाःगु पहल

येँ – लकडाउनया ई ताःहाकः जुयावःलिसे थुकिं विकराल रुप कयाः विविध समस्या न्ह्यःने हयाच्वंगु सन्दर्भय् नेवाः जागरण मञ्चं छगू वक्तव्य पिथनाः नेवाः समुदायनं यायेमाःगु पहलत न्ह्यब्वःगु दु ।

मञ्चया नायः सुजीव वज्राचार्यं आइतवाः पिथंगु वक्तव्यय् लकडाउनया इलय् थवंथवय् मानवीय आर्थिक गुहालि यायेगु भावना जायेकाः व्यक्तिगत व संघसंस्थामार्फत् पहल कायेत इनाप यानातःगु दु ।

अथे हे, लकडाउन धुंकाः पिहांवइगु आर्थिक, व्यापारिक समस्यायात बिचाः यासें कार्ययोजना दयेकेगु अले बहाः पुलेगु समस्या छेँथुवाः व बालं च्वनीपिनि दथुइ सहलह जुयाः तय जुइमाःगु व थुकी सुयांपाखें अनावश्यक हस्तक्षेप जुइकेमबीत सचेत जुइत नं इनाप यानातःगु दु ।

लकडाउन आन्तरिक रुपं पालना याकेगु तर पिनें मनू दुकायेगु थुज्वःगु प्रवृत्तिया विरोध यासें नेवाः जागरण मञ्चं स्वनिगःदुने पिनें मनू दुमकायेगु खँय् सतर्क व सचेत जुयाः प्रशासनयात दबाब बीत नं धाःगु दु ।

लकडाउनया इलय् सरकारपाखें वयेफुगु नेवाःविरोधी विधयेक, थीथीकथंया निर्णय इत्यादि खँय् सतर्क व सचेत जुयाः थवंथवय् थीथी माध्यमं सम्पर्क दयेकाः च्वनेमाःगु धासें मञ्चं कोभिड–१९ या हुनिं जुयाच्वंगु लकडाउनया विषम परिस्थितिइ बेरोजगार मनूत खुँज्या, डकैटी, ठगी थुज्वःगु ज्याय् प्रवृत्त जुयावःगु खनेदुगुलिं सुरक्षाया सवालय् नं सतर्क व सचेत जुइत वक्तव्यय् इनाप यानातःगु दु ।

लिसें, नेवाः जागरण मञ्चं नेवाः ख्यःया समस्याग्रत अभियन्ता, कार्यकर्तापिनि पहिचान यानाः गुहालि यायेगु पहल जुइधुंकूगु जानकारी नं ब्यूगु दु ।