ने. सं. ११४४ कौलाथ्व षष्ठी -

विश्वकप पुलुपालु

विश्वकप स्वयेत ट्याक्टरय्

कासा ख्यलय् दकलय् लोकंह्वाःगु कासा फुटबल धकाः अथें धाःगु मखु । उकिसनं विश्वकप फुटबल ला स्वकुमिपिंसं त्वःफिकीगु खँ जुइमखु । उकिं हे जुइ स्वीट्जरल्याण्डया छम्ह समर्थक सर्बिया विरुद्धया कासाय् थःगु देय्यात समर्थन यायेत ट्याक्टरय् च्वनाः रुस थ्यंकः वःगु दु ।

वंगु शुक्रवाः चान्हय् लिबाक जूगु कासाय् थःगु देय्या समर्थन यायेत बिट स्टडर नांया स्वीस नागरिक २००० किलोमीटरया दूरी ट्याक्टरय् च्वनाः पार यानाः रुस थ्यंकः वःगु खः ।

थःगु देय्या ‘डाइहार्ट फ्यान’ स्टडरं यात्राया झ्वलय् थःत अतिकं याःगु टयाक्टर छगलं देय्या ध्वाँचं छायेपियाः तसकं थीगु निभालय् नं रुस्या कोलिनग्राग सहर थ्यंकः वःगु खः ।थः निम्ह पासा वेर्नर जिमरम्यान व जोसेफ वायरलिसें १२ न्हुया यात्रा यानाः रुस थ्यंकः वःगु खः ।

विरामी मस्तय् म्हगस पूवन

विश्वकप फुटबल प्रत्यक्ष रुपं रंगशालाय् वनाः स्वयेगु म्हगस सु फुटबल समर्थकया मजुइ । अय्नं सकसिनं थ्व म्हगस पूवंके फइमखु । मेमेगु देय्या ला खँ हे त्वःतादिसँ विश्वकप आयोजक राष्ट्रया हे गुलिखे समर्थकतय्सं प्रत्यक्ष रुपं मैदानय् वनाः विश्वकपया आनन्द काये खनीमखु ।

उकिसनं विपन्न परिवार व शारीरिक रुपं असक्षमपिनिगु निंतिं ला थ्व म्हगस हे जुयाच्वनी । थज्याःगु अवस्थाय् स्वास्थ्य गम्भिर समस्या जूपिं ३० म्ह मस्तय्त रंगशालाय् वनाः विश्वकप फुटबल स्वयेगु अवसर रुसया छम्ह धनाढ्य रोमान इब्राहिमोभिच व दातातय् छगू पुचलं चूलाका बिउगु दु ।

इब्राहिमोभिच व दातातय् पुचलं थज्याःगु अवसर रुसय् च्वंपिं मखसे इजरालयय् च्वंपिं मस्तय् निंतिं चूलाका बिउगु खः । इमिसं विश्वकपया प्रमुख कासा स्वयेगु निंतिं छवाःया हवाइ टिकट, होटल व नसाज्वलंया तकं व्यवस्था याना बिउगु इपिं मस्तय् निंतिं ।

चर्चाय् वःगु थ्रो–इन

विश्वकप फुटबल अन्तर्गत वंगु बुधवाः स्पेन व इरान दथुइ जूगु कासा ला अवश्य हे स्वयादीगु दु जुइ । उगु कासा स्पेनं १–० गोल अन्तरं त्याकूगु खः । खय्तला उगु कासायात कयाः लुमंकातयेबहगु अज्याःगु छुं घटना वा खँ मदु । स्पेनया समर्थकया निंतिं छगू जक गोल हे छाय् मजुइमाः व लुमंकेबहगु क्षण खयेफु । तर कासाय् लुमन्तिइ वयाच्वनीगु छगू मेगु क्षण नं दु ।

कासा अन्तिम इलय् न्ह्यानाच्वंगु खः, गुगु इलय् सन् २०१०या विश्वकप विजेत स्पेनयात बराबरीइ पनेत इरानयात १ गोलया आवश्यक दुगु खः ।थ्व सुनौलो अवसर मालाच्वंपिं इरानी कासामिपिंत स्पेनया डी एरिया लिक्कं थ्रो–इन यायेगु अवसर वल ।

अबलय् इरानया मिलाद मोहम्मदी बल थ्रो–इन यायेत वल । बल कयाखतः छु भचा लिचिल, बलयात छक्वः चुप्पा नल अले छ्यं क्वःछुका एक्रोब्याटिक शैलीं बल वांछ्वयेत व त्यांग्रा पुल तर बल धाःसा वांछ्वये मफुत । लिपा हानं अथे हे यायेत्यंबलय् रेफ्रीं पनेवं परम्परागत शैलीं हे बल वांछ्वंल ।