नेपाल पुचःया मंकाः राजीनामा स्थगित

येँ – जनता समाजवादी पार्टीं प्रधानमन्त्री केपी शर्मा ओलीयात विश्वासया मत मबीगु निर्णय यायेवं देय्या राजनीतिइ न्हूगु मोड वइगु संकेत खने दुगु दु । उगु पार्टीया अध्यक्ष महन्थ ठाकुर व वरिष्ठ नेता राजेन्द्र महतों म्हिगः प्रधानमन्त्री ओलीयात हे नापलासें वय्कःयात विश्वासया मत मबीगु जानकारी यानादीगु खः ।

जनता समाजवादी पार्टीं प्रधानमन्त्री ओलीयात विश्वासया मत मबीगु जुइवं एमालेया माधव नेपाल पुचलं बी धाःगु मंकाः राजीनामा स्थगित याःगु दु । जसपा तटस्थ च्वनीगु जूगुलिं ओलीया पक्षय् बहुमत मदइगु जुइवं मंकाः राजीनामा स्थगित जुइफइगु खँ नेपाल पुचःया सांसद जीवनराम श्रेष्ठं ‘नेपालभाषा टाइम्स’ यात कनादिल । प्रम ओलीयात विश्वासया मत कायेगु नितिं १३६ मत माः ।

एमालेयाके तत्काल १२३ मत जक दु । अथे जुयाः कन्हय् विश्वासया मत कायेगु झ्वलय् प्रम ओलीयाके बहुमत मदइगु जूगुलिं मंकाः राजीनामा स्थगित जुइफुगु खँ वय्कलं कनादिल । म्हिगः नेपाल पुचःया सांसदत मंकाः राजीनामा यायेत संसद सचिवालयय् मुनाच्वंगु इलय् ओली पक्षया महासचिव विष्णु पौडेल व सुवास नेम्वाङ संसद सचिवालय वनाः नेता नेपाललिसे सहलह यानादीगु खः ।