जापान सरकारया प्रतिनिधिलिसे न्यायिक समितिया अन्तक्र्रियात्मक सहलह
येँ(नेपालभाषा टाइम्स)- येँ महानगर पालिकाया उपप्रमुख सुनिता डंगोलं स्थानीय न्यायिक निरुपणलिसे सम्बन्धित ऐनय् सहरी विवादया न्हूगु प्रकृतित दुथ्याके मफयाच्वंगु खँ धयादीगु दु । वय्कलं न्यायिक समितिं कार्य सम्पादन याइगु इलय् प्रचलित कानुन व व्यवहार निगुलिं पक्षयात समान महत्व बियाः विवाद व समस्या समाधानया कुतः यानाच्वंगु नं धयादीगु दु ।
येँ महानगर उपप्रमुख डंगोलं उगु खँ जापान सरकारया न्याय मन्त्रालय अन्तर्गतया अन्तर्राष्ट्रिय सहयोग कार्यक्रमया पदाधिकारीलिसे जूगु अन्तक्र्रियात्मक सहलहया इलय् धयादीगु खः ।
न्यायिक समितिया संयोजक तकं जुयाच्वनादीम्ह महानगर उपप्रमुख डंगोलं उगु इलय् न्यायिक समितिया क्षेत्राधिकार व प्रयोगया विषयय् नं जानकारी बियादिसें न्याय सम्पादन यायेबलय् कानुनया सर्वमान्य सिद्धान्त, नजिरलिसें प्रचलित कानुनया मूल्य मान्यताकथं न्याय सम्पादन यायेगु याना वयाच्वनागु जानकारी बियादिल ।
महानगरया न्यायिक सम्पादन प्रक्रिया, न्यायिक व्यवहारया बारे जानकारी बियादिसें वय्कलं कानुनी ज्ञान मदुपिंत वडास्तरय् निःशुल्क कानुनी सहायता, मेलमिलाप याये फइगु विवादया निंतिं वडा मिसा संजाल, वडाय् हे स्थापना यानागु मेलमिलाप केन्द्र व कक्षया बारे नं जानकारी बियादीगु खः ।
उगु इलय् जापानया अन्तर्राष्ट्रिय सहयोग नियोगया प्राध्यापकलिसें न्यायाधिश सोइची हारां प्राविधिक विषयय् लाःगु उजुरीया निर्णय बारे जिज्ञासा तयादीगु खः । अथे हे जापान अन्तरराष्ट्रिय सहयोग नियोगका कानुन विज्ञ मिहा इसोइं मनोसामाजिक परामर्शदाताया आवश्यकता महसुस यानागु दु कि मदु धइगु बारे जिज्ञासा तयादीगु खः ।
वय्कःपिनिगु जिज्ञासायात कयाः उपप्रमुख डंगोलं विषयलिसे सम्बन्धित विभागपाखें आवश्यकताया आधारय् राय, सल्लाह व प्राविधिक ग्वाहालि कायेगु यानाच्वनागु जानकारी बियादीगु खः ।
न्यायिक समितिलिसे न्यायिक निरुपणया बारे जानकारी कायेत अन्तर्राष्ट्रिय सहयोग कार्यक्रमया प्राध्यापक लिसें न्यायाधीश सोइची हाराया नेतृत्वय् प्राध्यापक एवं सरकारी वकिल चिनोने, प्रशासकीय अधिकृत तेत्सु कामिया, जापान अन्तर्राष्ट्रिय सहयोग नियोगका कानुन विज्ञ मिहा इसोइ, नेपाःया राष्ट्रिय कानुन परामर्शदाता अमन महर्जनया पुचः वःगु खः ।
LEAVE YOUR COMMENTS