सामुदायिक सेवा केन्द्रपाखें सम्मान

येँ – सामुदायिक सेवा केन्द्र व सामुदायिक प्रहरी सेवा केन्द्रपाखें मोहनि, स्वन्ति, न्हूदँ नेपाल संवत् ११३९ व छठ पर्वया लसताय् लाकाः भिंतुना कालबिल व सम्मान ज्याझ्वः याःगु दु । येँ महानगरपालिका वडा नं. २८ बागबजारय् च्वंगु सिटी स्क्वायरय् जूगु ज्याझ्वलय् मूपाहां प्रहरी नायब महानिरीक्षक मनोज न्यौपानें थीथी ख्यलय् योगदान बियादीपिंत सम्मान यानादीगु खः ।

ज्याझ्वलय् नेपाःया नांजाःम्ह म्येँ हालामि प्रेमध्वज प्रधान, नेपाल स्वयमसेवी रक्तदाता समाजया केन्द्रीय नायःलिसें स्वयमसेवी शतक हिदाता प्रेमसागर कर्माचार्य, वरिष्ठ नृत्य निर्देशक श्याम खड्गी, नांजाःम्ह संगीतकार राजु सिंह, दलबहादुर छिमि श्रेष्ठ, पुलांपिं वडाअध्यक्षपिं नजरमान तण्डुकार, गणेशबहादुर खड्गी, रामपुकार श्रेष्ठ, रामसुन्दर रायमाझी व बाबुकाजी श्रेष्ठयात मूपाहां न्यौपानें सम्मान पत्र लःल्हानाः सम्मान यानादीगु खः ।

सम्मानित सकसितं केन्द्रया अध्यक्ष विपेन्द्र खड्गीं दोसल्लां न्ययेकादीगु ज्याझ्वलय् कमरुद्दिन मियां लसकुस यानादीगु खः ।