ओलीं देउवायाके ग्वाहालि फ्वन

थःम्हं छुं बचं मबियागु देउवाया स्पष्टीकरण

येँ (नेपालभाषा टाइम्स) – नेपाल कम्युनिष्ट पार्टी दुने आन्तरिक विवाद तच्वयाः वनेवं प्रधानमन्त्री केपी ओली शर्मां थःगु सत्ता ल्यंकेगु निंतिं प्रमुख प्रतिपक्ष कांग्रेसयाके ग्वाहालि फ्वंगु खँ सीदुगु दु ।

पार्टी दुने ओलीया राजीनामा फ्वनेगु क्रम अप्वया वयेवं प्रम ओलीं कांग्रेसया नेतृत्व लिसे लगातार सहलह ब्याकेगु याःगु खः । प्रम ओलीं थः विश्वास पात्र पुलांम्ह सभामुख सुभास नेम्वाङ मार्फत सत्ता साझेदारीयात निंतिं कांग्रेस सभापति शेरबहादुर देउवायात प्रस्ताव छ्वःगु खँ पिहां वःगु दु। म्हिगः नेम्वाङं सभापति देउवायात नापलायेवं सत्तारुढ नेकपा व प्रतिपक्षी कांग्रेस निगुलिं पार्टी दुने हल्लाखल्ला न्यंगु दु ।

म्हिगः च्वंगु कांग्रेसया केन्द्रीय समितिया बैठकय् सभापति देउवां हे थःत प्रधानमन्त्री ओली व वय्कःया राजीनामा फ्वनाच्वंपिं पुष्पकमल दाहाल
व माधव नेपालया पक्षपिंसं थीथी प्रस्ताव तः वयाच्वंगु खँ धयादीगु दु। बैठकय् वरिष्ठ नेता रामचन्द्र पौडेलं सभापति देउवां प्रधानमन्त्री ओलीयात नापलाःगु व वयां लिपा नेम्वाबं नापलाःवःगु बारे देउवायाके न्ह्यसः थंगु खः । पौडेलया न्ह्यसलय् लिसः बीगु झ्वलय् देउवां निगुलिं पक्षया नेतातय्सं थःत तारन्तार नापलाः वयाच्वंगु खँ धयादीगु दु ।

देउवां केन्द्रीय कमिटी ब्रिफिब यायेगु झ्वलय् संसदया अधिवेशनया लिपांगु इलय् टेलिफोनय् खँ जूगु व वयां लिपा बालुवाटारय् नं प्रमयात नापलायेगु ज्या जूगु खँ कनादीगु खः । बालुवाटारय् नापलायेगु झ्वलय् प्रम ओलीं पार्टी दुने समस्या जूगु धासें थःत ग्वाहालि यायेत इनाप याःगु खँ धयादीगु खः। देउवां पार्टीया बैठकय् ब्रिफिङ यायेगु झ्वलय् धयादीगु दु, ‘खँल्हाबल्हाया झ्वलय् प्रधानमन्त्री थःगु खँ तयादिल, छिं तिबः बीमाः धकाः नं धयादिल, जिं पार्टीइ सहलह याये धकाः धयागु दु, तर गणतन्त्रयात हे लिच्वः लाइगु कथं न्ह्याःवनेगु खःसा अज्याःगु खँ थःत स्वीकार्य जुइमखु धकाः जिं स्पष्ट धयागु दु।’

पार्टीया बैठकय् सभापति देउवां सत्ता सहकार्यया निंतिं नेम्वाबं प्रस्ताव ज्वनावःगु खँ धासें उकिया बारे थम्हं गुगुं नं कथं लिसः मबियागु खँ नं कनादीगु दु। नेम्वाबं कांग्रेसया केन्द्रीय समितिया बैठकय् संसद स्थगित जूगु विषययात चर्के मयायेत नं थःत इनाप याःगु खँ नं देउवां बैठकय् कनादीगु खः ।

‘अशोभनीय घटनाक्रम’
आः विकसित जुयाच्वंगु राजनीतिक घटनाक्रम अशोभनीय जूगु विश्लेषण राजनीतिक विश्लेषक राजेन्द्र महर्जनं यानादीगु दु। सत्ताय् च्वनाच्वंम्ह प्रधानमन्त्री व विपक्षी नेपाली कांग्रेसया दथुइ आवश्यक जुल धाःसा वर्तमान सरकार लिसे सत्ता साझेदारी यायेगु कथं जुयाच्वंगु तयारी देय् व जनताया निंतिं पाय्छि मजुइगु खँ वय्कलं धयादीगु दु।

वय्कलं धयादी, ‘विपक्षी पार्टी धइगु सरकारं यानाच्वंगु ज्या सही खः कि मखु धकाः स्वइम्ह ‘वाच डग’ जुइमाःगु खः । तर विपक्षी पार्टी नं सत्ताय् वनेत जक स्वयाच्वंगु दु। थ्व नेपाःया राजनीतिया निंतिं पाय्छि मखु, थथे जुइगु खःसा देशय् अझ अप्वः राजनीतिक अस्थिरता ब्वलनी ।’

ओली सरकारं दुई तिहाइ बहुमत दुगु थःगु पार्टी त्वःताः प्रतिपक्ष पार्टीयाके थःगु सत्ता ल्यंकेगु निंतिं ग्वाहालि फ्वनेगु, तर थःगु हे पार्टीलिसे सहमति मयायेगु धइगु चरम राजनीतिक अविश्वासया नमूना जूगु धासें वय्कलं वर्तमान सरकारया प्रस्तुति ग्यानापूगु खँ धयादीगु दु। वय्कलं धयादी, ‘थःगु हे पार्टीया दुई तिहाइ बहुमत दयेक दयेक प्रतिपक्षया पार्टीया ग्वाहाली कायेमाःगु अवस्था ब्वलनीगु धयागु घच्चायापूगु राजनीति मखुसा मेगु छु जुइ ?’

वर्तमान सरकारया क्रियाकलाप बेथितिपूर्ण जूगु धासें वय्कलं देशय् कोरोना भाइरसया कारणं महामारी ब्वलनाच्वंगु इलय् सत्ता ल्यंकेगु निंतिं प्रधानमन्त्री ओलीं म्हिताच्वंगु राजनीतिक कासा स्वाभाविक मजूगु खँ धयादीगु दु ।

‘आःया सरकारया ज्यायात स्वयेगु खःसा सिद्धान्तविहीन सरकारं थःगु सत्ता ल्यंकेगु नितिं थःगु पार्टी तछ्यायेगु लिफः मस्वइगु जक मखु मालधाःसा सत्ता ल्यंकेगु निंतिं विपक्षी पार्टी लिसे जानाः हाकनं सरकारयात निरन्तरता बीगु कुतः तकं याइ धयागु क्यनाच्वंगु दु। थ्व धयागु सिद्धान्तविहीन अवस्था खः’ वय्कलं धयादिल ।