जैसीदेवल क्लबया सम्मान ज्याझ्वः

येँ (नेपालभाषा टाइम्स)- जैसीदेवल युथ क्लबं तेक्वान्डो कासा ताःलाःपिंत विशेष ज्याझ्वः यासें सम्मान याःगु दु । क्लबया अध्यक्ष नापं अन्तर्राष्ट्रिय रेफ्रि ६ डान राजेश प्रजापतिया सभापतित्वय् न्ह्याःगु उगु ज्याझ्वलय् क्लबं जैसिदेवल तेक्वान्डो डोजाड्ड जुनियर ग्रेडिड्ड दसिपौ लःल्हायेगु, निक्वःगु मदन भण्डारी तेक्वान्डो प्रतियोगिताय् विजयी कासामि, निक्वःगु वागमती प्रदेश खेलकूद प्रतियोगिताय् विजयी जूपिं कासामि व प्रथम गढीमाई अन्तर्राष्ट्रिय तेक्वान्डो प्रतियोगिताय् विजयी जूपिं जैसीदेवल तेक्वान्डो डोजाड्डया कासामिपिंत मूपाहां येँ महानगरपालिकाया प्रवक्ता नापं येँमपा १७ वडाया अध्यक्ष नविन मानन्धरं सम्मान नापं पुरस्कार लःल्हाःगु खः ।

ज्याझ्वलय् न्ववासे मूपाहां मानन्धरं ल्याय्म्हतय्त संगठित यायेत जैसीदेवल क्लबं याइगु थीथी खेलकुदया गतिविधि संचालन यायेगु निंतिं स्थानीय सरकारया आः वइगु बजेटं निरन्तरता बीत पहल जुयाच्वंगु खँ कनादिसें डोजाङया कासापिंत खाजा नकेगु निंतिं थःगु व्यक्तिगत रुपं स्वीद्वः तका ग्वाहालि यायेगु बचं नं बियादीगु खः ।