नेपालभाषाया कक्षा नं अनलाइनं सञ्चालन

येँ – कोरोना संक्रमण नियन्त्रणया लागिं सरकारं लागू याःगु निषेधाज्ञाया इलय् नं येँ महानगरपालिका दुनेया आपालं सामुदायिक स्कुलय् अनलाइन मार्फत नेपालभाषाया माध्यमं स्थानीय विषयया कक्षा न्ह्यानाच्वंगु खँ सीदुगु दु । निषेधाज्ञां यानाः विद्यालय बन्द जुयाच्वंगु इलय् नेपालभाषाया कक्षा अन्यौलग्रस्त जू वंगु खःसां येँ मनपाया शिक्षा विभागया पहलय् अन्यौल जुयाच्वंगु थासय् नं नेपालभाषा ब्वंकेगु व्यवस्था याःगु खः ।

सामुदायिक स्कुलय् स्थानीय विषय नेपालभाषा ब्वंकेगु लागिं येँ मनपां नियुक्त याःपिं प्रशिक्षण सहायक (शिक्षक) त लिसे शुक्रवाः अनलाइन माध्यमं सहलह ज्याझ्वः जूगु खः । उकी ब्वति काःपिं आपालं शिक्षकतय्सं थःपिंत खटे याना छ्वःगु स्कुलय् न्हापा अनलाइन कक्षा कायेके मबिउगु खःसां आः कक्षा कायेके बियाच्वंगु जानकारी बिउगु खः ।

सामुदायिक स्कुलय् आखः ब्वनीपिं आपालं धइथें विद्यार्थीतय्के मोबाइल÷ल्यापटब थेंज्याःगु साधन मदुगु जुयाः गुलिखे स्कुलं छुं हे विषय अनलाइन कक्षा कयाच्वंगु मदुसा गुलिखे स्कुलतय्सं ४ तगिमंनिसें जक अनलाइन कक्षा कायेगु यानाच्वंगु दु । अज्याःगु अनलाइन कक्षाय् नं कुल विद्यार्थी मध्ये ३०–४० प्रतिशत जक विद्यार्थी वइगु जुयाच्वंगु दु ।

अनलाइन कक्षा जुयाच्वंगु स्कुलय् नेपालभाषाया कक्षा नं अप्वः यानाः ४ तगिमं च्वय् जक ब्वंकेगु ज्या जुयाच्वंगु खँ शिक्षकतय्सं धाःगु दु । अनलाइन कक्षा जुयाच्वंगु स्कुलय् विद्यार्थीतय्सं नेपालभाषाया क्लासयात अतिकं न्ह्यइपुक कयाच्वंगु व कक्षा अझ बढे याये माल धकाः इनाप समेत यानाच्वंगु खँ शिक्षकतय्सं धाःगु दु । नखःचखः, येँया सम्पदा आदि थेंज्याःगु विषयय् विद्यार्थीतय्गु अतिकं रुची दुगु व उकी उमिसं थप जिज्ञासा तयेगु यानाच्वंगु अनुभव नं शिक्षकतय्सं याःगु दु ।

येँ मनपा शहरी योजना आयोगया दुजः गुजेश्वरी श्रेष्ठया सभापतित्वय् च्वंगु उगु मुँज्याय् शिक्षा विभागया अधिकृत मोतिराज खनालं कक्षा सञ्चालनय् समस्या दुगु स्कुलय् थःपिंसं प्रधानाध्यापकयात फोन यानाः सहजीकरण यानाच्वनागु खँ कनादीगु खः । शिक्षा विभागपाखें थज्याःगु मुँज्या नियमित रुपं तया यंकेगु खँ धाःगु दु ।

सम्बन्धित बुखँ

LEAVE YOUR COMMENTS