अन्तिम सभाय् दलया नेतातपाखें अनेक आश्वासन
येँ – स्थानीय तह निर्वाचनया झ्वलय् म्हिगः जूगु अन्तिम सभाय् न्ववासें थीथी पार्टीया नेतातय्सं थःथःगु पार्टीया उम्मेदवारपिंत भोट बियाः त्याकेत इनाप यानादिल ।
प्रधानमन्त्री लिसें नेपाली कांग्रेसया सभापति शेर बहादुर देउवां म्हिगः थःगु हे गृह जिल्ला डडेल्धुराय् अन्तिम सभा यानादिल । अन न्ववासें वय्कलं पश्चिम सेती परियोजना यदि चीनयात दयेके बिल धाःसा भारतं विद्युत न्याना काइ मखु, उकिं थ्व परियोजना भारतयात हे दयेके बीगु घोषणा यानादिल । जेठ २ गते लुम्बिनीइ भारतीय प्रधानमन्त्री नरेन्द्र मोदीलिसे जुइगु खँल्हाबल्हाय् थम्हं थ्वहे खँ तयेगु जानकारी नं वय्कलं बियादिल । उलि जक मखु, यदि कांग्रेस त्यात धाःसा सुदुर पश्चिम प्रदेशया राजधानी हे डडेल्धुराय् सारे यायेगु आश्वासन तकं बियादिल ।
मेखे एमालेया अध्यक्ष केपी ओलीया अन्तिम सम्बोधन येँया भृकुटीमण्डपय् जूगु सभाय् जुल । उगु सभायात सम्बोधन यासें अध्यक्ष ओलीं सर्वोच्च अदालतं न्हापा कांग्रेसपाखें याःगु संसद विघटनयात वैध घोषणा याःगु तर एमालें संसद विघटन याःबलय् अवैध धकाः फैसला याःगु धासें सर्वोच्च अदालतया फैसलायात आलोचना यानादिल ।
मेखे नेपाली कांग्रेसया नेता प्रकाशमान सिंहं एमाले अध्यक्ष ओली प्रधानमन्त्री जूगु इलय् पटक पटक संसद विघटन यानाः देशयात अस्थिर याःगु कारणं हे न्यागू दलया गठबन्धन दयेकेमाःगु खः धयादिल । अथे हे येँया असनय् जूगु सभाय् न्ववासें कांग्रेस नेता गगन थापां ओलीपाखें संसद विघटनया ज्या याःगु कारणं देय्या न्यादँ सितिकं वंगु दु धासें उकिया लागिं ओलीयात सजायँ बीमाःगु खँ तयादिल ।
एमाले अध्यक्ष ओलीं कांग्रेस लगायतया न्यागू दल छथाय् च्वंसां नं एमालेयात बुके मफइगु दावी यासें एमालेया विजय निश्चित दुगु खँ कनादिल ।
LEAVE YOUR COMMENTS