ने. सं. ११४४ ञलाथ्व नवमी -

लछि जक दनिपिं कर्मचारीयात स्वेच्छिक अवकाश मबीगु

येँ – सेवा निवृत्त जुइत छुं ई जक ल्यं दनिपिं निजामति कर्मचारीयात स्वेच्छिक अवकास योजनाय् दुमथ्याकीगु जूगु दु । राज्ययात अनावश्यक आर्थिक भार लाइगु धासें न्हूगु सरकारं देउवा सरकारं यानातःगु नीतिइ पुनर्विचार यायेगु खँ धाःगु खः । सरकारं हःगु स्वेच्छिक अवकाश योजनाय् आवेदन बीगु अन्तिम न्हि म्हिगः खः । सरकारं ४५ न्हुया म्याद तयाः पितहःगु थ्व योजनाय् आःतक स्वद्वःम्हेसिनं जक आवेदन बिउगु दु ।

संघीय संरचना कथं समायोजनाय् वने चाहे मजूपिं ५० दँ थ्यनेधुंकूपिं व सेवा अवधि २० दँ पुलेधुंकूपिं कर्मचारीतय्त एकमुष्ठ न्हय्दँया पेन्सन, सञ्चय कोष, वासः खर्च व संचित बिदाया ध्यबा सहित अवकाश बिइगु योजना देउवा सरकारं हःगु खः । सरकारया थ्व योजनाय् आवेदन बिउपिं मध्ये सेवा अवधि लछि जक ल्यं दनिपिं कर्मचारीतय्सं तकं आवेदन बिउगु खः । थज्याःगु आवेदन धाःसा स्वीकार मयायेगु खँ वातावरण मन्त्री लालबाबु पण्डितं धयादीगु दु । सरकारया थ्व योजनाय् २२ हजार कर्मचारीत आवेदन बीत योग्य दुगु खः । तर आशा यानातः स्वयां तसकं म्हो जक आवेदन वःगु खँ सामान्य प्रशासन मन्त्रालयया सहसचिव नीता अर्यालं धयादीगु दु ।

कर्मचारीपाखें असहयोग
संघीय प्रणाली अन्तर्गतया थीथी प्रदेशय् खटे याःपिं कर्मचारीतय्सं सरकारयात असहयोग याःगु द्वपं लाःगु दु । प्रदेशय् खटे याःपिं कर्मचारीत प्रदेशय् वना मबिउगु कारणं अन ज्या यायेत तकं थाकुयाच्वंगु दु । कर्मचारी मदयाः मन्त्रालय खाली जुयाच्वंगु दु । थथे असहयोग याःपिं कर्मचारीतय्त कारवाही यायेमाःगु सः नं थ्वया वःगु दु ।