सामुदायिक विद्यालय असल नागरिक उत्पादन

सामुदायिक विद्यालयं देशभक्त व असल नागरिक उत्पादन याइगु पाठ््यक्रमसहितया कार्ययोजना हयेमाःगु सुझाव बिउगु दु । सामुदायिक विद्यालयय् ईयात ल्वःकथंया शिक्षाया विकास जुइ मफुगु कारणं विद्यार्थी म्हो जुइगु क्रम वयाच्वंगु अवस्थाय् अज्याःगु विद्यालयं आः न्हूगु पाठ््यक्रम विकास यानाः देय्यात माया यायेमाः धइगु आदर्श, असल आचरण दुपिं दक्ष जनशक्ति उत्पादन याइगु थाय्या रुपय् विकास यायेमाःगु सुझाव विज्ञपाखें वःगु खः ।

येँ निर्वाचन क्षेत्र नं ८ अन्तर्गतया झिंच्यागू सामुदायिक विद्यालयया प्रतिनिधि, विज्ञ व जनप्रतिनिधिं देय्या राजनीतिक, प्रशासनिक लगायत दक्वं तहयात आवश्यक जुइकथंया नैतिकवान नागरिकया अभाव दुगु कारणं राष्ट्र निर्माणं गति काये मफुगु ठहर याःगु खः ।

विद्यालय व्यवस्थापन समितियापाखें प्रयागराज सिंह सुवालं वि.सं. १९९७ य् राणा शासनया विरुद्ध जनमत तयार यायेत औपचारिक व अनौपचारिक रुपय् स्थापना जूगु गुरुकुल व शिक्षालयं असल नेता उत्पादन यायेगु लक्ष्य काःगु लुमंकादिसें शुक्रराज शास्त्री जोशीं खय् भाय् व गंगालाल श्रेष्ठं अंग्रेजी भासं अध्यापन याकूगु धयादिल ।

उगु इलय् देशय् विकास जूगु राष्ट्रप्रेम व स्वतन्त्रताया शिक्षां जोशी व श्रेष्ठसहित धर्मभक्त माथेमा, दशरथ चन्दयात सहीद जुइत अभिप्रेरणा प्राप्त जूगु वय्कलं धयादिल । सामुदायिक विद्यालयया संचालक समितिइ जुइगु राजनीतिक हस्तक्षेपं यानाः थौंकन्हय् शिक्षाया गुणस्तर कुहां वयाच्वंगु दु ।

छुं शिक्षक थःगु पेशाप्रति जिम्मेवार जुइ मफुगुलिं यानाः विद्यार्थी व समग्र विद्यालयया स्थिति हे कमजोर जुजुं वनाच्वंगु दु ।सामुदायिक विद्यालय व निजी विद्यालयया लिच्वलय् खने दुगु तःधंगु अन्तरं वर्तमान शैक्षिक अवस्था सन्तोषजनक जुइ फयाच्वंगु मदु । प्रतिनिधिसभा सदस्य जीवनराम श्रेष्ठं २१ औं शताब्दीइ देय्या विकासया निंतिं राज्यया थीथी तहय् आवश्यक जुइगु जनशक्ति निर्माण यायेत सामुदायिक विद्यालयया भूमिका महत्वपूर्ण जुइगु धयादिल ।

नेपाल ओलम्पिक कमिटीया अध्यक्षतकं जुयाच्वनादीम्ह श्रेष्ठं विद्यालयया सबल व दुर्बल पक्षया अध्ययन यानाः न्हूगु रणनीतिक विकासया निंतिं जनप्रतिनिधिपाखें याःगु अपेक्षा पूरा यायेत थः प्रतिवद्ध जुयाच्वनेगु धयादिल । विद्यालय निरीक्षण व सुपरीवेक्षण यायेगु, याकेगु ज्याय् नियमितता मदु ।

शिक्षाया नियमावलीया कथं निरीक्षकं लछिइ म्होतिं नं छक्वः विद्यालयया निरीक्षण व सुपरीवेक्षण यायेगु, याकेगु व उकथं निरीक्षण व सुपरीवेक्षण यायेगु झ्वलय् प्रधानाध्यापक व विद्यालय व्यवस्थापन समितिलिसे सहलह यायेमाःगु व्यवस्था दु । आः स्थानीय तहया क्षेत्राधिकार दुने विद्यालय व्यवस्थापन व संचालनया जिम्मेवारी बियातःगु दु ।

कालिमातिस्थित जनप्रभात मा.वि.या संचालक समितिया अध्यक्ष रामशरण डंगोलं शिक्षा पेशा समाजय् पवित्र माने यानातःगु धासें बाफलय् च्वंगु ज्ञानोदय मावि लगायत छुं सामुदायिक विद्यालयं व्यवस्था याःगु शिक्षक व विकास याःगु पाठ््यक्रमं नमूना विद्यालयया रुपय् महत्व स्थापिन याःगुलिइ इमित अनुशरण याना वनेमाः धयादिल ।

गुलिखे सामुदायिक विद्यालयय् निरीक्षक व स्रोत व्यक्तिं अनुगमन याये मलाइगु जूगुलिं शिक्षकया हाजिरी अभिलेखय् तकं समस्या वयाच्वंगु दु । सामुदायिक विद्यालय हस्तान्तरण यानाः सरकारं छुं ध्यबा उपलब्ध याकेगु स्वयां नं विद्यालयया एकीकरण यानाः विद्यालयया शैक्षिक व प्राज्ञिक वातावरणय् सुधार हयेमाःगु आवश्यक दु ।

विद्यालय इलय् आखः मब्वंकीम्ह शिक्षक, कार्यस्थलय् मदइगु, राजनीतिक गतिविधिइ संलग्न जुयाच्वंगु खने दुम्ह शिक्षकं प्राज्ञिक क्षेत्रय् योगदान बी फइमखु । येँ महानगरपालिकाया प्रवक्ता ईश्वरमान डंगोलया कथं सामुदायिक विद्यालयया शैक्षिक गुणस्तर अभिवृद्धिया निंतिं थःगु संस्थां आवश्यक जुल धाःसा हस्तक्षेपकारी भूमिका म्हितेमाः ।

सम्बन्धित बुखँ

LEAVE YOUR COMMENTS