ने. सं. ११४४ कछलागा षष्ठी -

किपुलिइ ऐतिहासिक थाय्या नां संरक्षणया निंतिं अभियान

किपू – थनया ऐतिहासिक थाय्या नांया संरक्षण यायेगु निंतिं सचेतना अभियान न्ह्याःगु दु । थनया स्थानीय ल्याय्म्हतय् छगू पुचलं ऐतिहासिक थाय्या नां संरक्षण व सचेतना अभियान न्ह्याकूगु खः । गोपालवंशकालंनिसें मानव वस्तीया अस्तित्व दुगु ऐतिहासिक थाय् जूगु धासें व उकिया क्षेत्रया इतिहासया थीथी कालखण्डय् अस्तित्वय् वयाः आतक नं प्रचलित ऐतिहासिक थाय्या नां कायम जुयाच्वंगु धासें उकिया संरक्षण यायेगु उद्देश्यं उगु अभियान न्ह्याकागु अभियानया संयोजक भरत महर्जनं कनादीगु दु । गुगुं नं थाय्या नां अर्थहीन जुइमखु । छुं न छुं कथंया ऐतिहासिक थाय्या नामं किपू क्षेत्रया प्राचीन मानवीय गतिविधि, सभ्यताया क्रमिक विकासक्रम, भाषिक विकास, धार्मिक व सांस्कृतिक इतिहास थुइकेगु, सीकेगु व उकियात दुवाले फइगु धासें अज्याःगु नां किपूया ऐतिहासि व सांस्कृतिक सम्पत्ति जूगु संयोजक महर्जनं कनादीगु दु ।

थ्व हे झ्वलय् लिपांगु इलय् किपुलिइ न्हूगु बस्ती, आवास क्षेत्र, प्लटिंग, हाउजिंग निर्माण जुया वनाच्वंगु सन्दर्भय् अज्याःगु थासय् थःयथे नां तयाः साइनबोर्डतकं तयेगु प्रवृत्ति अप्वया वनाच्वंगु दु । शदिऔं निसें प्रचलित स्थानीय नांयात हुयाः व्यक्ति विशेषं कल्पना याःगु भरय् काल्पनिक नां स्थापित यायेत स्वयेगु इतिहासयात हे न्ह्ंकेगु स्वयेगु खः, उकिं अज्याःगु थाय्या संरक्षण यायेगु उद्देश्यं हे थ्व अयिभान न्ह्याकागु संयोजक महर्जनं ‘नेपालभाषा टाइम्स’यात कनादिल । थ्व झ्वलय् वंगु चैत ६ गते किपूया फय्खा धइगु थाय्यात ‘फय्खानगर’ नामाकारण यायेकथं ध्वाखातकं प्रतिस्थापन यानाः अभियानयात औपचारिकता बीगु ज्या जूगु दु । अभियानयात तीव्रता बिया यंकेत महर्जनया संयोजकत्वय् छगू समिति नं गठन याःगु दु । अभियानया सचिवय् सरिता महर्जन च्वनादीगु दुसा दुजलय् हिराकाजि महर्जन, किरण महर्जन, प्रविण शाक्य, राजेश महर्जन, सुवर्ण महर्जन व कविन महर्जन च्वनादीगु दु । अथे हे सल्लाहकार लक्ष्मीकुमार महर्जन, केश रत्न बज्राचार्य, राजेश महर्जन (फय्खा) च्वनादीगु दु ।