केपी ओलीं प्रधानमन्त्रीया दावी न्ह्यब्वल

येँ– एमाले अध्यक्ष केपी ओलीं थौं राष्ट्रपति विद्यादेवी भण्डारीयात नापलानाः न्हूगु सरकार गठनया निंतिं दावी न्ह्यब्वयादीगु दु । थौं सुथय् ९ बजे राष्ट्रपति भवन शितल निवासय् वनाः राष्ट्रपति भण्डारीयात नापलासें थःगु नेतृत्वय् सरकार दयेकेत दावी न्ह्यब्वयादीगु दु ।
निर्वाचन आयोगं समानुपातिक पाखें सांसद जूपिं सहित सांसदतय् नांधलः राष्ट्रपतियात लःल्हाये धुनेवं ओलीं थौं प्रधानमन्त्रीया दावी यानादीगु खः ।
राष्ट्रपतियात नापलायेत माओवादी नेतात लिसें एमाले अध्यक्ष केपी ओली शितल निवास झायादीगु खः । ओलीयात थौं हे प्रधानमन्त्री नियुक्त यायेगु तयारी जुयाच्वंगु दु ।
थ्वयां न्ह्यव प्रधानमन्त्री शेरबहादुर देउवां देय्या नामय् संवोधन यासें राजीनामा बियादीत्यंगु दु । देउवाया राजीनामा वयेवं केपी ओलीयात प्रधानमन्त्रीइ नियुक्त याइ । प्रधानमन्त्री देउवा राजीनामा बी न्ह्यव आः अन्तिम मन्त्रिपरिषद्या बैठकय् च्वनाच्वंगु दु ।