‘धरहरा चायेकि !’ – प्रम ओलीपाखें कर्मचारीयात निर्देशन

येँ(नेपालभाषा टाइम्स)÷प्रधानमन्त्री केपी शर्मा ओलीं धरहरा चायेकाः मनू वये–वने ज्या सञ्चालन यायेत निर्देशन बियादीगु दु । म्हिगः सिंहदरबारय् मन्त्री व सचिवतय्त निर्देशन बिसें वय्कलं धरहराया लिफ्ट खतं नयाच्वंगु जूगुलिं उकियात छ्यलाबुलाय् हये लिबाके मजिउगु खँ नं धयादीगु खः ।

प्रम ओलीं धयादिल, ‘धरहरा दयेकेधुंकूगु दु, मनूत अन थहां वने चाहे जुयाच्वंगु दु, तर थहां वने फयाच्वंगु मदु । अन पार्किङ बने जूसां तयार मजूनि तर निःशुल्क पार्किङ धकाः ह्वारर, पार्किङय् ध्यबा पुलेमाः । गाडी गयाः जुइपिंसं पार्किङय् ध्यबा पुले फइ मखु धइगु जुइ मखु ।’

वय्कलं ‘जिं दयेके जिगु धरहरा’ अभियान अन्तर्गत जनताया ३६ करोड तका धरहराय् लगानी जूगुलिं व्यवस्थित ढंगं सञ्चालन जुइमाः धासें धयादिल, ‘अन दुगु लिफ्ट छाय् खतं नकाः तयेगु ? निगू निगू लिफ्ट अन दु । ल्याय्म्हतय्त स्वाहाने दु । बुराबुरियात लिफ्ट दु । अले छाय् सञ्चालन मयायेगु ? गुगु मन्त्रालयं गुकथं सञ्चालन यायेगु खः कार्यविधि दयेकाः सञ्चालन यायेमाः ।’

वय्कलं धरहरा क्षेत्रया पार्किङ गुगुं पालिका विशेषया मजूगु धासें पार्किङ क्षेत्रयात संघीय सरकार मातहत हे सञ्चालनया नितिं तयारी यायेत नं निर्देशन बियादीगु दु । म्हिगः निर्देशन बीगु झ्वलय् धरहरायात येँ महानगरपालिकां खुला याःगु खँय् नं वय्कलं असन्तुष्टि प्वंकादीगु दु ।

पुनर्निर्माण जूगु धरहरा क्षेत्रया अधिग्रहण सहित सञ्चालन व भूमिगत पार्किङया परिकल्पना थःगु जूगु दाबी यासें प्रधानमन्त्री ओली धरहरा चायेकेमाःगु खँ धयादीगु खः । वय्कलं कमलादीइ दयेकूगु ‘स्काइ वाक टावरं’ दँय् २२ करोड कमे याःगु दाबी यासें धरहरा नं सरकारया निंतिं आयस्रोत जुइफइगु खँ धयादीगु दु । ओलीं दयेकाच्वंगु अवस्थाय् हे २२ तले मू टावर दयेकेगु ज्या क्वचाःगु धासें २०७८ वैशाख ११ गते धरहराया उलेज्या यानादीगु खः ।

नेपालभाषा टाइम्स

च्वमिया मेमेगु

• ‘नुगः चफुना’ या म्यूजिक भिडियो पिदन
• नेपालभाषाया न्हूगु श्रृंखला वइगु
• एनपिएल ः जनकपुर व चितवन त्यात
• बौद्धविद्वान प्रजापतिया हना
• प्रधानमन्त्री ओलीया चीन भ्रमण, छुं न्हूगु सम्झौता मजुइगु