ने. सं. ११४४ कौलाथ्व चौथी -

प्रताप मल्लया शिखर शैलीं हे दयेकीगु

येँ – लानिपुखू दयेकेगु बारे निर्णय यायेत नीस्वंगु रानीपोखरी पुनर्निर्माण अध्ययन विशेष समितिं म्हिगः सभागृहय् स्थानीय जनताया सुझाव कायेगु ज्या यात ।
सहलह मुँज्याय् विज्ञ समूहया संयोजक लिसें पुरातत्व विभागया पुलांम्ह महानिर्देशक विश्वराज कार्की थःपिंसं तयार यानागु प्रतिवेदन थीथी स्वंगू ब्वय् न्ह्यब्वयादीगु खः । वय्कलं न्ह्यब्वयादीगु सुझाव प्रतिवेदनय् लानिपुखूयात प्रताप मल्ल कालया संरचनाय् शिखर शैलीं हे दयेकेमाःगु खँ न्ह्यथनातःगु दु । लिसें पुखूया थीथी अवस्था व स्थितियात मालाः परम्परागत रुपं जीर्णोद्धार यायेत थप पुरातात्विक अध्ययन यायेमाःगु सुझाव नं बिउगु दु ।

पुरातात्विक उत्खनन्पाखें पुखुली परम्परागत ढंगं व्यवस्था यानातःगु लःया स्रोतया अनुसन्धान यायेमाःगु व पुखुली लः मुंकेगु व पिने छ्वयेगु लँपु नं मालेमाःगु सुझाव बिउगु दु । अथेहे पुखूया मौलिक स्वरुप व संवेदनशिलतायात प्रतिकुल लिच्वः लाकेगु कथं दयेका तःगु कंक्रिटया पःखाः चीकाः परम्परागत स्वरुपय् ज्या यायेमाःगु सुझाव नं बिउगु दु । पुखूया दथुइ लाक्क च्वंगु बालगोपालेश्वर देगःया जगया स्थिति सीकेगु निंतिं पुरातात्विक उत्खनन् यायेमाःगु सुझाव नं उकी दु ।
बालगोपाल देगलय् तयातःगु मकराकृटि हिति मध्ये न्हूगु स्वरुपय् दयेकूगु हितियात चीकाः एकरुपता हयेगु निंतिं पुलांगु शैली हे दयेकेमाःगु सुझाव बियातःगु दु । पुखू जीर्णोद्धार यायेगु निंतिं माःगु अप्पा प्रताप मल्लकालीन गुणस्तरया जुइमाःगु सुझाव नं बियातःगु दु ।

निगूगु चरणया सुझाव कथं रानीपुखूलिइ पुलांगु स्वरुप नष्ट जुइ कथं लिपा दयेकूगु संचरनायात पूवंक हे चीकाः पुलांगु स्वरुपय् निर्माा यायेमाःगु सुझाव बिउगु दु । लिसे पुखूया उत्तर व दक्षिणपाखेया भाग भुखाय् लिपा थुंगुलिं पुखूया द्यां बचे यायेगु ज्या याकनं न्ह्याकेमाःगु सुझाव बिउगु दु । यदि तत्काल उगु द्याँ बचे यायेमफुत धाःसा वा वइगु इलय् दुनावनिगु जुयाः अज्याःगु सुझाव बिउगु खः । पुखुलिइ मुनिगु लःया स्थायित्व बिइत थीथी प्राविधिक उपाय मालेमाःगु सुझाव नं बिउगु दु । सुझाव बीगु झ्वलय् जिर्णोद्वार लिपा पुखूया पुरातात्विक लिसें ऐतिहासिक लसक कायम यानाः सौन्दर्यीकरण यायेगु सुझाव बियातःगु खःसा आपालं सहलह ज्याझ्वलय् ब्वति काःपिंसं थुकिया विरोध याःगु दु ।

रानीपुखूयात गुगु नं कथंया व्यापारिक थाय् दयेके मजिउगु सुझाव ज्याझ्वलय् ब्वति काःपिंसं बिउगु खः । अथेहे सुझावय् रानीपुखूया प्यखेरं दुगु देगःयात रानीपुखू दुने हे लाकेमाःगु सुझाव बियातःगु दु । झिंखुपाः ल्हाः दुम्ह गणेद्य, आः आकासे तां दुगु थाय् च्वम्ह भैलः द्यः व प्रहरी ज्याकूया लिउने दुम्ह द्यःयात नं रानीपुखूया दुनेया थाय् जूगुलिं उगु अन दुपिं द्यःयात नं रानीपुखूया दुने लाकेगु जक मखु सें अन सांस्कृतिक व धार्मिक ज्याझ्वः यायेमाःगु सुझाव बिउगु दु । उकथं हे रानीपुखूया उत्तरपाखे दयेकातःगु छेँ थुनाः परम्परागत रुपं न्ह्यानावयाच्वंगु चांगुनारायणया कलश यात्राया दुगु थाय्या सम्पदायात उकिया सांस्कृतिक महत्व अभिवृद्धि यायेमाःगु सुझाव नं बिउगु दु ।

प्रताप मल्ल व निम्ह काय्पिं गयाच्वंगु किसीइ चुन इलातःगुयात चीकाः मौलिक स्वरुप कायम यायेमाःगु सुझाव बियातःगु दु ।
उगु सुझावयात कयाः आपालं ब्वतिकाःपिंसं थुकिया कार्यान्वयनयात कयाः न्ह्यसः तःगु खःसा लिसः बीगु झ्वलय् संयोजक कार्कीं थ्व थःपिनिगु सुझाव जक जूगु व उकियात शनिवाः तक अन्तिम रुप बियाः आइतवाः येँ महानगरपालिकाया मेयर विद्यासुन्दर शाक्ययात लःल्हायेगु खँ कनादिल । लिसें वय्कलं नेपाःया परम्परायात म्वाकातयेगु खःसा स्थानीय जनताया सुझाव, सल्लाह व दवाव निरन्तर जुयाच्वनेमाःगु खँय् नं बःबियादिल ।