कोरोना खने दत धाःसा नेपालं छु याइ ?

येँ- नेपालय् आः तक कोरोना संक्रमण जूगु लूगु ला मदुनि, यदि गनं लुल धाःसा अज्याःगु इलय् छु यायेगु धकाः नेपालं नं योजना दयेकूगु दु । यदि गनं कोरोना संक्रमित लुल धाःसा सरकारं निश्चित क्षेत्र क्वःछिनाः तुरुन्त हे ‘लक डाउन’ यायेगु योजना दयेकूगु खँ सीदुगु दु । स्वास्थ्य तथा जनसंख्या मन्त्रालयया प्रवक्ता डा. विकास देवकोटाया कथं गुगुं नं क्षेत्रय् संक्रमण खनेदत धाःसा अत्यावश्यक सेवा बाहेक मेगु सेवा बन्द यायेगु व पकेट एरिया लक डाउन यायेगु योजना सरकारं दयेकूगु खः ।

वय्कलं धयादी, ‘व इलय् फुक्क बन्द यानाः थीथी उपकरण व जनशक्ति छथाय् तयाः परिचालन जुइ । आवश्यक जुल धाःसा फिल्ड व मोबाइल अस्पताल नं परिचालन याइ । कोरोना संक्रमण खनेदयेवं भारतं नेपाःया नाकाय् कडाई याःगु दुसा पर्यटक आवागमन नं बन्द याःगु दु ।

कोरोनाया प्रभाव विश्वव्यापी जुजुं वनाच्वंसां नेपालय् सरकारं यानाच्वंगु पूर्व तयारी प्रयाप्त मजू धासें सरकारया आलोचना जुयाच्वंगु दु । तर प्रवक्ता देवकोटां धाःसा विकसित जूगु संक्रमण कथं व्यवस्थापन यायेगु तयारी जुयाच्वंगु जानकारी बियादीगु दु ।

प्रवक्ता डा. देवकोटाया कथं आः तक नेपालय् प्यसःम्हेसित परीक्षण याःगु दुसा उकी मध्ये छम्हेसित जक संक्रमण खनेदुगु व उम्ह मनू नं वासः यानाः लिहां वनेधुंकूगु दु । थौंकन्हय् टेकुइ च्वंगु शुक्रराज ट्रपिकल तथा सरुवा रोग अस्पतालय् प्यम्ह व यल अस्पतालय् निम्हेसित आइसोलेसनय् तयाः वासः यानाच्वंगु खँ नं वय्कलं कनादीगु दु ।

कोरोना भाइरसया खतरा अप्वया वनेवं आः सरकारं छु याये माली धकाः सहलह यायेत सरकारं म्हीग सर्वदलीय बैठक सःतूगु खः ।

सम्बन्धित बुखँ

LEAVE YOUR COMMENTS