वालुवाटारया जग्गा हिनामिना प्रकरण पौडेल विरुद्ध सतकय् प्रदर्शन

येँ – वालुवाटारया प्रधानमन्त्री आवास व प्रधानन्यायाधीश आवासया जग्गा निजी यानाःलि वहे जग्गा न्याना तःगु खँय् विवादय् वयाच्वंम्ह सत्तारुढ पार्टी नेपाल कम्युनिष्ट पार्टीया महासचिव बिष्णु पौडेल विरुद्ध सतक आन्दोलन नं शुरु जूगु दु । थ्व जग्गा हिनामिना यायेगु ज्याय् बिष्णु पौडेलया नं जग्गा दुगु खँ पिहां वयेवं म्हिगः नेपाली कांग्रेस समर्थित विद्यार्थी संगठन नेवि संघं येँय् जग्गा प्रकरणय् ठगे जूम्ह बिष्णु पौडेलयात क्षतिपूर्ति बीगु लागिं धकाः लँय् च्वनाः छतका छतका दां चन्दा कायेगु ज्या याःगु खः । पौडेलयात व्यंग्य स्वरुप नेवि संघं उगु ज्या याःगु खः ।

नेवि संघं काभ्रेया दुवातय् च्वनाः लँय् वःपिं मनूतय्पाखें छतका छतका दां चन्दा कायेगु ज्या याःगु खः । म्हिगः शनिवाः छन्हुं ६७३ तका दां उठे जूगु खँ विद्यार्थीतय्सं धाःगु दु । थ्व अभियान आः देय्न्यंकं यायेगु खँ नं नेवि संघं धाःगु दु ।

थ्वहे झ्वलय् म्हिगः ‘नेपालको लागि नेपाली’ धाःगु संस्थां नं म्हिगः छगू मोटरसाइकल ¥याली यासें सरकारी सम्पत्ति रक्षा यायेत आह्वान याःगु दु । सरकारी सम्पत्ति सरकारी मनूतय्सं हे हड्पे याःगु पाय्छि मजुल धासें उमिसं म्हिगः येँया सिनामंगलं ¥याली पिकाःगु खः ।

वालुवाटारय् सरकारं कया तयेधुंकूगु जग्गा निजीया नामय् वनाच्वंगु बारे छानबिन यायां हे उकी सत्तारुढ दल नेपाल कम्युनिष्ट पार्टीया महासचिव बिष्णु पौडेलया नं जग्गा दु धइगु खँ पिहां वयेवं विवाद अझ तच्वः जुया वंगु खः । पौडेलं अन थः काय नविनया नामय् ८ आना जग्गा तयातःगु खः ।

छानबिन यानाच्वंपिंसं उगु थासय् जग्गा हिनामिना यायेगु ज्याय् ग्वाहालि याःगु वापत पौडेलयात ८ आना जग्गा ‘कमिशन’ स्वरुप बिउगु आशंका याःगु दु । तर पौडेलं धाःसा अन थःपिंसं हिनामिना यानागु मखुसें ध्यबा पुलाः न्याना तयागु खः धकाः दावी यानादीगु दु । तर वय्कलं अन जग्गा गुलि ध्यबां न्यानागु धकाः छुं मधाःसां वय्कलं तसकं कम जक ध्यबां जग्गा न्याःगु खनेदुगु खँ धाःगु दु ।

सूत्रतय्सं धाः कथं महासचिव पौडेलया नां थुकी समावेश जुयाः पिहां वयेवं सत्तारुढ दल नेकपा दुने नं गम्भीर न्ह्यसः पिहां वःगु दु । स्वयम् वालुवाटार दुने तकं आः पौडेलं छानबिन सिमधःतले नैतिकताया आधारय् महासचिव पदं राजीनामा बिउसा बांलाः धाइपिं पिहां वःगु दु ।
वय्कःया बारे सञ्चार मन्त्रीं न्ववानादीगु खँ नं विवादय् लाःगु दु ।

सम्बन्धित बुखँ

LEAVE YOUR COMMENTS