ने. सं. ११४६ बछलागा सप्तमी -

कस्तिइ दु यक्व हे गुण

कस्ति धरतीइ दइगु दकलय् पुलांगु चाकुगु चीज खः । कस्ति यक्व हे चीजय् छ्यलेगु याः । स्वास्थ्यया निंतिं थ्व तसकं हे निं । कस्तिया नियमित सेवन यानाच्वन धाःसा उकिं झीगु म्हयात गाक्क हे फुर्ति, शक्ति व ऊर्जा बियाच्वनी । कस्तिं म्हयात स्लीम दयेकाः बांलाकातइ । कस्तिं ल्ह्वंपिनिगु तौल क्वकयाबीसा गंसिपिनिगु तौल थकयाबी । चाकुगु कस्तिया थीथी गुणं ल्वगि मनूयात नं स्वस्थ यानाबी । आःझासँ, थुकिं जुइगु मेमेगु फाइदाया बारे खँल्हाये ।

कस्तिइ भिटामिन ए, बी, सी, आइरन, क्याल्सियम, सोडियम, फस्फोरस, आयोडिन दु । न्हियान्हिथं कस्ति सेवन यानाच्वन धाःसा म्हय् ल्वय् नाप ल्वायेगु शक्ति अप्वयावइ ।
मुसु व दमयात नं कस्ति नयाः लायेकेफु । पालुतिइ कस्ति ल्वाकछ्यानाः नकाबिल धाःसा मुसु वःगु लनावनी ।
हाइ ब्लड प्रेसरयात नियन्त्रणय् तयेत नं कस्ति सफल जू ।
कस्तिं हि सफा यायेत नं ग्वाहालि याइ ।
नुगःस्येँ बल्लाकेत, नुगलं बांलाक ज्या याकेत व नुगःस्येँ सम्बन्धि थीथी ल्वय्पाखें बचे जुइकातयेत नं कस्तिं ग्वाहालि याइ ।
न्हिं न्हिं कस्ति सेवन यानाच्वन धाःसा दिमागया कमजोरी नं मदयावनी ।
कस्तिया सेवनं स्यःकै, पलः आदि वंकाः ख्वालय् चमक दयेकाबी । छिं गुलाबजल, कागति व कस्ति ल्वाकछ्यानाः ख्वालय् बुलेगु यानादिसँ ।
गर्मी मौसमय् लखय् कस्ति ल्वाकछ्यानाः त्वनाबिल धाःसा प्वाः याउँसे (हलुका जुइ) च्वनी ।
पाके जूगु अंया रसय् कस्ति ल्वाकछ्यानाः कायेगु यात धाःसा म्हासुल्वचय् फाइदा जुइ ।
ख्वाः फ्वफ्वः धायाच्वन धाःसा कस्ति, दुरुया क्रिम व बेसन ल्वाकछ्यानाः क्वं बुले थें बुलादिसँ । थुकिं ख्वालय् चमक नं वयेकाबी ।
न्हिं न्हिं कस्तिया सेवन यानाच्वन धाःसा किडनी व आतापुति स्वस्थ जुयाच्वनी ।
कस्ति क्षतिग्रस्त छ्यंगूया उपचारय् सहायक जुइ । थुकिं एक्जिमा (चासु ल्वय्), छ्यंगू मनावःगु व छ्यंगूया मेमेगु विकारयात प्रभावकारी ढंगं उपचार याइ ।
गोलभ्यारा अथवा सन्तरासिया रसय् छगू चम्चा कस्ति ल्वाकछ्यानाः न्हिं न्हिं सेवन यानाच्वन धाःसा कब्जियत मजुयावनी ।
कस्तिया एन्टीब्याक्टेरियल व एन्टी माइक्रोबियल गुणं छुं छुं ब्याक्टेरियाया बृद्धियात पनी । थथे जूगुलिं घाः जूथाय्, चाःथाय् व मिं पूथाय् व कय्पूथाय् थ्व इलाबीगु याइ ।
कस्ति घाः सफा यायेत, नवःगु व न्हि दाःगु मदयेकेत, स्याःगु क्वलाकेत व याकनं उपचार जुइकेत छ्यलेगु याः ।
आदिकालं निसें अनिन्द्राया ल्वचय् घरेलु उपचारया रुपय् कस्तियात छ्यलेगु याना वयाच्वंगु खः । बहनी द्यने न्ह्यः छगू गिलास दुरुइ चिधंगु चम्चां छगू चम्चा कस्ति तयाः त्वनाबिल धाःसा क्वातुक न्ह्यः वइ ।
कस्तिं भिंगु ब्याक्टेरिया अर्थात प्रोबायोटिकया उत्पादन याइ । थुकिं पाचनशक्ति बल्लाकेत तःधंगु हे ग्वाहालि याइ ।
कस्तिया एन्टी-अक्सिडेन्ट गुणं क्यान्सर सम्बन्धि लक्षणयात पनेत ग्वाहालि याइ । लिसें क्यान्सरलिसे ल्वायेत नं ग्वाहालि याइ ।