येँ–धौख्यलय् रुटय् न्हूगु यातायात सेवा न्ह्याकल

येँ – येँ नं धौख्यः रुटय् थप प्यंगू यातायात व्यवसायी रुट परमिट कयाः नीगः बस म्हिगः निसें सञ्चालनय् हःगु दु । साझा यातायात, सिटी यातायात, मेट्रो यातायात व अन्नपूर्ण यातायातं उगु रुटय् बस सञ्चालन याःगु खः । उगु रुटय् म्हिगः हे दर्ता यानाः यातायात चले यायेगु व्यवस्था यातायात व्यवस्था विभागं याःगु खः । पुलांगु बस व्यवसायीं ताः ई तक बस चले मयात धाःसा उमिगु रुट परिमिट खारेज यायेगु तयारी विभागं यानाच्वंगु दु । यातायात व्यवस्था विभागया कथं उगु रुटय् यातायात सञ्चालन यायेगु निंतिं मेगु यातायात कम्पनी वयाच्वंगु जानकारी नं विभागं बिउगु दु ।

विभागं सिन्डिकेटया अन्त्या यासें न्हूगु निर्देशिका व मापदण्ड जारी यायेवं उगु रुटय् यातायात सञ्चालन याना वयाच्वंगु ११ गू यातायात व्यवसायी संघ आन्दोलन याःगु खः । विभागं मयुर यातायातयात रुट परमित जारी यायेवं उगु कम्पनीया गाडी तोडफोड यायेगु ज्या नं यातायात व्यवसायी याःगु खः । विभागं न्हूगु यातायात व्यवसायीयात सुरक्षाया व्यवस्था मिले यानागु खँ धाःगु दु । रुट व यात्रुतय् चाप स्वयां न्हूगु यातायात व्यवसायीयात सञ्चालन यायेगु निंतिं अनुमति बीत विभागं तयारी याःगु दु ।