ने. सं. ११४४ चौलाथ्व दशमी -

निन्हु लिपा हे दाहालं भाय् हिल

येँ – नेपाल कम्युनिष्ट पार्टी (नेकपा) या अध्यक्ष लिसें पुलांम्ह प्रधानमन्त्री पुष्पकमल दाहालं पार्टी एकीकरण जूगु इलय् याना तःगु गोप्य सहमतियात मिडियां बिस्कं ढंगं ब्याख्या याःगु दावी यानादीगु दु । धरानय् कार्यकर्तायात सम्बोधन यासें वय्कलं मिडियां च्वःगु व प्रसारण याःगु गलत ब्याख्याया लिउने मवनेत इनाप नं यानादिल ।

वय्कलं निम्ह अध्यक्ष मध्ये छम्ह न्ह्याम्हसां न्यादँ तक हे प्रधानमन्त्री जुइफु धासें प्रम ओलीं हे न्यादँ तक सरकार चले याइगु खँ नं कनादिल । थ्व स्वयां न्ह्यः प्रम ओली भारत भ्रमणय् वनाच्वंगु इलय् थःत झिंन्यालाया दुने सरकार हस्तान्तरण याइगु खँ कँसें दाहालं सुनां नं जिद्दि यानाच्वन धाःसा उकिया लिच्वः बांमलाइगु ख्याच्वः समेत बियादीगु खः ।

वय्कलं सहमति कथं हे याउँक सरकार हस्तान्तरण जुइगु दावी नं यानादीगु खः । तर दाहालं निन्हु लिपा हे वयाः भाय् हिलादीगुया कारण धाःसा मेगु हे दुगु खँ सूत्रं धाःगु दु । सूत्रया कथं दाहालया उगु धापू वयेधुंकाः पूर्व एमालेया केन्द्रीयनिसें जिल्लास्तरया नेतातय् दथुइ समेत हलचल वःगु खः ।

वयां लिपा पूर्व एमालेया थीथी जिल्ला नेतातय्सं वास्तविक खँ छु खः धकाः केन्द्रीय नेतातय्त न्यनेकने याना हयेवं दाहालया भाय् हिउगु खः । प्रधानमन्त्री वा अध्यक्ष मध्ये छम्हेस्यां छगू जक पद कायेगु धइगु विवाद क्वमलाःनिगु इलय् नेकपा दुने मेगु विवाद नं ब्वलंगु दु ।

ओली खेमां संगठन विभागया प्रमुखय् गृहमन्त्री रामबहादुर थापायात हयेत स्वयाच्वंगु दुसा दाहालं खेमां वामदेव गौतमयात संगठन विभागय् हयेत स्वयाच्वंगु दु । विभाग प्रमुख बारे निर्णय यायेत थाकुइगु जूगुलिं थौं सःता तःगु सचिवालयया बैठक नं कन्हय् जक च्वनीगु जूगु दु ।