बोडेया ऐतिहासिक कमलपुखू संरक्षणय् स्थानीयवासी

व्यक्तिया नामय् नामसारी जुयाः कारोबार (विक्री) तकं जुइधुंकूगु मध्यपुरथिमि नगरपालिका वडा नं. ८ बोडेय् च्वंगु ऐतिहासिक कमलपुखू अदालतं सार्वजनिक पुखू हे कायम जुइगु फैसला याःगुयालिसें स्थानीय वासिन्दात आः उगु पुखू ल्यंकेगु ज्याय् कुहां वःगु दु । पुखूया संरक्षण यासें डुंगा चले यानाः आन्तरिक पर्यटकतय् गन्तव्यस्थलया रुपय् विकास यायेगु लक्ष्यया लिसें मध्यपुरथिमि नगरपालिकां पुखू संरक्षणया निंतिं ७५ गू लाख बजेट न विनियोजन याःगु दु ।

सलंसः दँ न्ह्यःनिसें सार्वजनिक पुखूया रुपय् दयाच्वंगु तत्कालीन बोडे गाउँ पंचायत–६ कित्ता नं. १ या १५ रोपनी ९ आना जग्गा सार्वजनिक जग्गा व्यक्तिया नामय् दर्ता जुयाः विक्री वितरण याःगु धासें बोडे, नगदेशया स्थानीय वासिन्दां व्यक्तिया नामय् वनेधुंकूगु उगु पुखू सार्वजनिक हे कायम यानाः लित हयेमाःगु माग यासें अदालत वंगु खः ।

वि.सं. २०४२ साल असार ३१ गते कान्छी पोडेनीया नामय् दर्ता जुयाः २०५१ माघ २२ गते अधिकृत वारेसनामा बकसपत्र जुयाः मनाङ छेँ जुयाः थौंकन्हय् येँया थँबहिलिइ च्वंम्ह ग्याल्पो गुरुङ, तेन्जी शेर्पिनी, जद्योना गुरुङयात मिउगु खः । ग्याल्पों नं मेपिं थीथी व्यक्तियात जग्गा मिउगु खः । ख्पप जिल्ला अदालतया न्यायाधिश मातृकाप्रसाद मरासिनीया इजलासं उगु पुखू सार्वजनिक पुखू हे जुइकथं वंगु साउनया असारया लिपांगु वाःपाखे पैmसला यायेवं नगरपालिका व स्थानीय वासिन्दा पुखू संरक्षण यायेगु ज्याय् लगे जूगु खः ।

फैसला जूगु छन्हु लिपा हे मध्यपुरथिमि नगरपालिकां पुखुलिइ डोजर हयाः मिले यायेगु व सुचुकुचु याःगु खः । नगरपालिकाया प्रमुख मदनसुन्दर श्रेष्ठं उगु पुखू संरक्षणया निंतिं धकाः नगरपालिकां हालय् ७५ गू लाख विनियोजन याःगु कनादिल । वय्कलं धयादिल, ‘थ्व धार्मिक व सांस्कृतिक महत्व कुबियाच्वंगु पुखूया संरक्षण यानाः डुंगा संचालन यायेगु व आन्तरिक व बाह्य पर्यटकया आकर्षणया केन्द्र दयेकेगु जुइ ।’ नगरपालिकां पुखू जःखः पःखाः ग्वयेगु, अतिक्रमित जग्गा जूसा उकिया निकासा यायेगु, पुखूयात आकर्षक दयेकेगु व पर्यटकीय गन्तव्यया रुपय् विकास यायेगु वय्कलं धयादिल ।

भू–माफियालिसे स्थानीयवासीं कानुनी उपचार मालाः सार्वजनिक रुपय् लित हःगु पुखूया संरक्षण यायेगु स्थानीयवासी विरेन्द्र जयनां कनादिल । वय्कलं धयादिल, ‘आः नगरपालिका व स्थानीय वासिन्दा जानाः थ्व पुखूया संरक्षण यायेगु जुइ, भूमाफियातय्सं हाकनं छ्यं ल्ह्वना हल धाःसा उकिया लिसः बीगु जुइ ।’ व्यक्तिया नामय् वनेधुंकाः पुखुलिइ बस्ती दयेकेत डोजर ज्वनाः वःपिं माफियातय्त स्थानीयवासीतय्सं तःक्वः तःक्वः हे लिनाछ्वये धुंकूगु दु ।

स्थानीयवासिन्दा नापं नेमकिपाया नेता रमेश थापा श्रेष्ठं थःपिं मचाबलय् पलेस्वां ह्वइगु व पुखुलिइ म्हितेगु थ्व पुखुलिइ ह्वःगु पलेस्वां स्थानीय लाय्कू द रवारय् तलेजुयात छायेगु व साउन महिनाय् जुइगु नीलबाराही प्याखनय् नं उगु हे पुखुलिइ ह्वःगु पलेस्वां छानाः जात्रा न्यायेकगु परम्परा सलंसः दँ न्ह्यःनिसें न्ह्याना वयाच्वंगु धयादिल ।