वेल्सयात ४–० गोलं बुकाः डेनमार्क क्वार्टरफाइनलय्
येँ– वेल्सयात बुकाः डेनमार्क युरो कप २०२० या क्वार्टरफाइनलय् दुहां वंगु दु । शनिवाः जूगु नकआउट चरणया न्हापांगु कासाय् डेनमार्कं वेल्सयात ४–० गोलं बुकूगु खः । डेनमार्कया विजयया निंतिं क्यास्पर डोल्बर्गं निगू गोल याःगु खःसा वकिम माइले व मार्टिन ब्राथवेथं छगू छगू गोल याःगु खः । कासाया २३ औं मिनेटय् डोल्बर्गं बक्स पिनें बांलाःगु प्रहार यासें गोल याःगु खः । न्हापांगु हाफय् छगू गोलं अग्रता कयाच्वंगु डेनमार्कया निंतिं निगूगु हाफ सुरु जूगु स्वंगू मिनेट लिपा हे डोल्बर्गं थप छगू गोल याःगु खः ।
निगू हाफ सुरु जूगु छुं ई लिपा हे वेल्सया दबाबय् तयेगु झ्वलय् मार्टिन ब्राथवेथं याःगु प्रहार क्लियर यायेगु झ्वलय् वेल्सया डिफेन्डर नेको विलियम्सं थ्वाःगु बल तप्यंक डोल्बर्गया तुतिइ लाःवंगु खः । विलियम्सया गल्तीया लबः कासें डोल्बर्गं थप छगू गोल यासें डेनमार्कया विजय सुनिश्चित यानाबिउगु खः । कासा क्वचायेत २ मिनेट ल्यं दनिबलय् माइलें छगू गोल व इन्जुरी ईया प्यंगूगु मिनेटय् ब्राथवेथं छगू गोल याःगु खः । ।
कासाया इन्जुरी इलय् वेल्सया ह्यारि विल्सनयात रेड कार्ड बिइवं इन्जुरी ईया न्यागू मिनेट वेल्स झिम्ह कासामिइ सीमित जूगु खः । माइलेयात फल तःगुलिं विल्सनयात रेड कार्ड बिउगु खः । थुगुसीया युरोकपया थ्व निगूगु रेडकार्ड खःसा थ्व निगुलिं रेडकार्ड वेल्सयात बिउगु खः ।
२०१६ या युरो कपय् सेमिफाइनलय् थ्यंगु वेल्स थ्व पालय् अन्तिम १६ पाखें हे पिने लाःगु न्हापांगु टिम जूगु दु । डेनमार्क धाःसा थुगुसी समूह चरणय् न्हापांगु निगू कासा पराजित जूसां प्रि–क्वार्टरफाइनलय् थ्यनेत ताःलाःगु टिम खः । डेनमार्कं आः क्वार्टरफाइनलय् नेदरल्यान्ड व चेक रिपब्लिक दथुइ जूगु कासाय् त्याःगु टिम लिसे म्हिती ।
LEAVE YOUR COMMENTS