मेलम्चीया लः पना बीगु ख्याच्वः

येँ – गोकर्णेश्वर नगरपालिकाया स्थानीय मनूतय्सं यदि मेलम्चीं वइगु लः थःपिंत मबिल धाःसा थ्व लःयात मेथाय् नं मछ्वसे पना बीगु ख्याच्वः बिउगु दु । वंगु लछि न्ह्यवंनिसें सुन्दरी–जल, नयाँपाटी, गोकर्णेश्वर व जोरपाटी लागाय् लः मवःगु खँ उपभोक्तापिंसं धाःगु दु ।बागमति खुसिया लः न्हिं ९ करोड लिटर प्रशोधन यानाः शहरी लागाय् जक छ्वयाच्वंगु धासें थःपिं लःया स्रोतय् च्वनाः नं लः मदयाः समस्या फयाच्वनेमाःगु खँ स्थानीय जनतां धाःगु दु । स्थानीय निकायया चुनावय् लःया समस्या ज्यंकेगु धकाः जनप्रतिनिधि निर्वाचन जूगु खःसांं आः तक समस्या ज्यंकेगु निंतिं वडा लिसें नगरपालिकां नं चिउताः मक्यंगु द्वपं नं स्थानीय जनतां बिउगु दु ।

नगर प्रमुख सन्तोष चालिसें बागमतिया मुहान क्षेत्रया नागरिक–यात लः बीधुंकाः जक मेथाय् लः इनेत काठमाडौं खानेपानी लिमिटेड, खानेपानी तथा ढल निकास विभाग लगायतया सरोकार दुगु निकाययात इनाप यानागु खँ कनादिल । स्थानीय जनताया कथं मेलम्चीया लः वयेधुंकाः नं आयोजना कार्यान्वयन निर्देशनालयं आः तक गोकर्णेश्वर, कागेश्वरी मनोहरा नगरपालिकाय् लः इनेगु निंतिं पाइप लायेगु ज्या तकं मयाःगु द्वपं स्थानीय जनतां बिउगु दु । नगरप्रमुख चालिसें थःपिनिगु क्षेत्रय् लः मवयेकं मेथाय् लः मछ्वयेगु तयारी यानागु खँ कनादीगु दु ।यदि थःपिंत लः मबिल धाःसा स्थानीय जनतां आन्दोलन यायेगु तयारी तकं यानाच्वंगु दु । गोकर्णेश्वर–२, नयाँपाटीया स्थानीयवासीं मुहान क्षेत्रय् हे लः मवइगु जुल धाःसा मेलम्चीया लः स्वनिगलय् हे इंके मबीगु ख्याच्वः बिउगु दु ।

सम्बन्धित बुखँ

LEAVE YOUR COMMENTS