राष्ट्रपति सीया नसा वः व क्वाति

येँ – चिनियाँ नसात्वँसा धाल कि विश्वय् नांजाः । नसात्वँसाय् अज्याःगु नांजाःगु थासं झाःम्ह चिनियाँ राष्ट्रपति सी चिनफिबयात म्हिगः येँया होटल सोल्टीया बहनीया ब्यलिइ धाःसा नेवाः नसा नकेगु ज्या जूगु खः ।

वय्कलं थःगु ब्यलिया मूल कोर्श चिनियाँ खाना हे नयादीगु खःसां व स्वयां न्ह्यः स्न्याक्सया रुपय् धाःसा वय्कःयात नेवाःतय्सं नइगु वः व क्वाति नकेगु ज्या जूगु खः । वय्कःयात ब्यलि भ्वजय् वः व क्वाति ‘सर्भ’ यायेगु बारे न्हापा हे जानकारी नं बिउगु खः ।

वय्कःया लागिं विशेष चिनियाँ खाना दयेकेगु लागिं चीनं हे शेफ झिके याःगु खः । तर वः व क्वाति धाःसा नेपाःया हे शेफं दयेकूगु खः । राष्ट्रपतियात वः व क्वाति नकीगु जूगुलिं होटल सोल्टीइ वःपिं सकलें पाहांपिंत नं वहे नकेगु ज्या जूगु खः ।

चीन नसात्वँसाया लागिं विश्वय् हे नांजाःगु देय् खः । चीनया थीथी प्रान्तय् थीथी कथंया हे नसात्वँसा नयेगु दु । उकिं चिनियाँ राष्ट्रपतिया लागिं दकलय् न्हूगु नसा वः व क्वाति हे जुइगु तायेकाः वय्कःयात थ्व नसा ‘सर्भ’ याःगु खँ सूत्रं धाःगु दु । वय्कःया खानाया मेन कोर्श चिनियाँ नसा हे खःसां उकी नेपाःया खाना कथं वः व क्वाति लिसें युरोपियन नसा नं नकेगु ज्या जूगु खः ।

चिनियाँ राष्ट्रपतिया थ्व भ्रमण लिपा नेपालं पूर्वाधार विकास जक मखु न्ह्यःने वयाच्वंगु भिजिट नेपाल वर्ष २०२० यात सफल याकेत समेत ताःलाइगु विश्वास यानातःगु दु । राष्ट्रपति सी लिसें आपालं चिनियाँ पत्रकारत नं नेपाः भ्रमणय् वःगु दु ।

सम्बन्धित बुखँ

LEAVE YOUR COMMENTS