शवदाह गृह लिक्क प्रतिक्षालय निर्माण
ख्वप(नेपालभाषा टाइम्स)- ख्वप नगरपालिका वडा नं. ७ हनुमानघाटय् शवदाह गृह लिक्कसं प्रतिक्षालय निर्माणया निंतिं शिलान्यास याःगु दु । ख्वप नगरपालिकाया प्रमुख सुनिल प्रजापतिं उगु प्रतिक्षालयया शिलान्यास यानादीगु खः ।
ख्वप नगरपालिकां आर्थिक दँ ०७९÷८०या निंतिं स्वीकृत योजना अन्तर्गत प्रत्येक वडायात विकास निर्माणया निंतिं विनियोजन याःगु बजेटं उगु प्रतिक्षालय निर्माण यायेत्यंगु खः ।
विकास निर्माणया निंतिं प्रत्येक वडायात ५० लख दरं बजेट विनियोजन यायेगु नापं सम्पदा संरक्षणार्थ थप २० गू लख बजेट विनियोजन यानागु खँ कनादिसें नगर प्रमुख प्रजापतिं लागत स्वयां म्हो ध्यबां गुणस्तरीय रुपं निर्माणया ज्या जुयाच्वंगु जानकारी बियादिल ।
प्रतिक्षालय शिलान्यास यासें वय्कलं शवदाह गृह निर्माणं नगरवासीयात सुं नं मनू सित धाःसा दाहसंस्कार यायेत सहज जूगु नापं आः प्रतीक्षालय निर्माणं थप सुविधा जुइगु विश्वास प्वंकादिल ।
ज्याझ्वलय ख्वप नगरपालिका ७ वडाअध्यक्ष उकेश कवां नगरपाकिलाया जनप्रतिनिधि व कर्मचारीतय्सं नगर व नगरवासीया हितया निंतिं सक्रिय रुपं भूमिका म्हिता वयाच्वंगु धासें नगरपालिकां समाजवाद उन्मुख गतिविधिइ बः बिया वयाच्वंगु दु । धयादिल ।
उगु इलय् ७ वडा मिसा सदस्य रञ्जना त्वाति, प्रतिक्षालय निर्माण समितिया अध्यक्ष बद्रीराम छुस्याबागः व वडा सचिव विजय लोहलां नं थःथःगु नुगःखँ तयादीगु खः ।
LEAVE YOUR COMMENTS