छधा प्याखं कासाय् ब्वतिकाःपिंत सुभाय् देछाल
किपू (नेपालभाषा टाइम्स) – बागमती प्रदेश सामाजिक विकास मन्त्रालयया आर्थिक ग्वाहालिइ नेपालभाषा एकेदेमिया ग्वसालय् नेपालय् हे दकले न्हापांगु खुसि टेलिभिजनय् प्रत्यक्ष प्रसारण मार्फत छधा प्याखं ब्वज्या क्वचायेकुगु दुसाः छधा प्याखं कासाय् ब्वतिकाःपिन्त शन्चरबार किपुलिइ एकेडेमीया सभा भवनय् सुभाय् देछागु दु ।
वंगु असार १६ गते दिल्लाथ्व दशमी खुन्हु किपुया रारा हिल स्कुलय् च्वंगु किर्तिपुर नाटक घरय् जुउगु छधा प्याखं ब्वज्याय् ८ गु नाटकं ब्वति काःगु खः । कोरोना महामारीया संक्रमणया जोखिमयात विचाः याना दर्शकया सहभागी बिना नेपाः च्यानल टेलिभिजनय् प्रत्यक्ष प्रसारण मार्फत छधा प्याखं ब्वज्या सम्पन्न जुउगु खँ ग्वसाखलः एकेडेमीया सदस्य सचिव मल्ल के सुन्दरं कनादिल ।
उगु ब्वज्याय् नाटककार मीना बज्राचार्यया लिथु निर्देशक पवन जोशी, रामकृष्ण धिनाया थ्वपू कर्म राजेश शाक्य, शशीकला मानन्धरया चन्द्रहार निर्देशक आर्यम नकःमि, राजेन्द्रकुमार पुताया थौंकन्हे रवि महर्जन, लोककवि राजभाइ जकःमिया कीर्तिलक्ष्मी रामकृष्ण खडगीं निर्देशन यानादीगु खःसा लेखक, निर्देशक सुरेन्द्र तुलाधरया डा कान्छाभाई, लेखक, निर्देशक कृष्ण प्रजापतिया बुंख्याचा, लेखक, निर्देशक राजु श्रेष्ठया तरकारी बन्जा या क्यनेज्या जुउगु खः ।
उगु छधा प्याखं कासाय् ब्वतिकाःगु प्याखं या कलाकार, लेखक, निर्देशक व ग्वाहालिमिपिन्त शनिवार कीर्तिपुरस्थित नेपालभाषा एकेदेमि हलय् जुउगु ज्याझ्वलय् ग्वसाखलःया पाखें सुभाय् देछागु खः ।
नेपालभाषा एकेदेमिका प्राज्ञ एवं प्याखं ब्वज्या समितीया कजि बीरप्रसाद भन्सारीया सभानायसुइ जुउगु सुभाय् देछायेगु ज्याझ्वलय् विशेष अतिथि एकेडेमीया प्राज्ञ प्रा. डा. चन्द्रमान वज्राचार्य व वरिष्ठ चलचित्र पत्रकार एवं नेपालभाषा एकेडेमीया प्राज्ञ विजयरत्न असंबरं प्याखं ब्वज्या या समीक्षा यानादीगु खः ।
प्याखं ब्वज्या पुचः या दुजः एवं वरिष्ठ चलचित्र निर्देशक पवन जोशीं सुभाय् न्वचु तयादीगु उगु ज्याझ्वलय् ग्वसाखलःया मेम्ह दुजः लोकंह्वाम्ह गायक पवित्र कसाःभाजुं न्ह्याका दीगु खःसा ज्याझ्वलय् सुभाय् देछायेगु झ्वलय् सुभाय् पौ व मतिनाया चिं लःल्हागु खः ।
LEAVE YOUR COMMENTS