ने. सं. ११४४ कौलाथ्व पारू - नःलास्वनेगु

आखः ब्वनेत ख्वप नपापाखें त्यासा

येँ – ख्वप नगरपालिकां उच्च शिक्षा अध्ययन याइपिं विद्यार्थीयात सहुलियत त्यासा बीगु शुरु याःगु दु । ध्यबा मदयाः ब्वनेत समस्या जुयाच्वंपिं जेहेन्दार विद्यार्थीत ब्वनेगुपाखें बन्चित मजुइमा धकाः नगरपालिकां विद्यार्थीयात त्यासा बियाः ब्वंकेगु व्यवस्था याःगु खः । छम्ह विद्यार्थीयात न्यागू लाख तका तक ६ प्रतिशत ब्याजं त्यासा बीगु व्यवस्था याःगु दु ।

नगरपालिकां त्यासा बीगु सम्बन्धी ‘भक्तपुर नगरपालिका शैक्षिक त्यासा बीगु सम्बन्धय् निर्देशिका २०७५’ नं प्रकाशित याःगु दु । ख्वपय् स्थायी बसोबास यानाच्वंपिं ख्वप नगरपालिका दुनेया विद्यार्थीयात उगु त्यासा बीगु खँ धाःगु दु । त्यासा कायेगु निंतिं विद्यार्थीं वडां सिफारिस कया हयेमाःगु व वयां लिपा नगरपालिकां थःगु बजेटया सिमाय् च्वनाः न्हापा वइम्ह विद्यार्थीयात न्हापांगु प्राथमिकताया आधारय् त्यासा बीगु खँ धाःगु दु ।

विद्यार्थीयात त्यासा बीगु निंतिं नगरपालिकां न्यागू करोड तकाया बजेट विनियोजन यानातःगु दु । त्यासा माग याइपिं विद्यार्थीं गुगु तहलय् छु विषय कयाः अध्ययन यायेगु खः धइगु स्पष्ट रुपं खुले यायेमाः । त्यासा एसईई स्वयां च्वय्या तगिंया विद्यार्थीतय्त बी ।त्यासा कायेधुंकाः विद्यार्थीं ब्वनेज्या क्वचाःगु प्यदँया दुने फुक्कं त्यासा पुलेमाः ।

ब्वनेज्या क्वचाःगु न्हापांगु दँय् २५ प्रतिशत, निगूगु दँय् ५० प्रतिशत, स्वंगूगु दँय् ७५ प्रतिशत व प्यंगूगु दँय् फुक्कं त्यासा पुले सिधयेकेमाः । त्यासा मपुल धाःसा त्यासा काःम्हेसिया सम्पत्ति रोक्का यायेफइगु खँ ख्वप मनपां धाःगु दु । छखा छेँनं छम्हेस्यां जक अज्याःगु त्यासा काये दइ । त्यासा छक्वलं वा किस्ताबन्दीइ पुलेफइगु खँ ख्वप नगरपालिकां धाःगु दु । शैक्षिक त्यासा प्रत्येक वडाया झिम्हेसित बी ।