प्रधानमन्त्रीया प्रविधि सल्लाहकारयात बर्खास्त यायेत माग

येँ – नेपाली कांग्रेसया केन्द्रीय दुजः डा. शेखर कोइरालां प्रधानमन्त्री केपी ओलीया सूचना प्रविधि सल्लाहकार असगर अलीयात पदं बर्खास्त यायेमाःगु माग यानादीगु दु । शुक्रवाः छगू वक्तव्य जारी यासें वय्कलं थ्व माग यानादीगु खः ।

प्रधानमन्त्रीया सूचना प्रविधि सल्लाहकार अलीं बिहिवाः ‘काठमाडौं प्रेस’ अनलाइनय् वःगु छगू समाचारयात थःगु छगू कम्पनी मार्फत ह्याक यानाः समाचार हे लिकया बिउगु खः । थ्व घटनायात कयाः डा. कोइरालां अलीया बर्खास्त माग यासें दोषीपिंत तुरुन्त कारवाही यायेमाःगु माग याःगु खः ।

डा. कोइरालां जारी याःगु विज्ञप्तिइ संसारय् गनं हे मजुइगु घटना यानाः प्रेस व अभिव्यक्ति स्वतन्त्रताया हननया उच्चतम व निकृष्ट नमूना क्यंगु खँ धयातःगु दु ।

अलीया लगानी दुगु सिरान टेक्नोलोजीं काठमाडौं प्रेसया अनलाइन ह्याक यानाः समाचार लिकाःगु खः । थ्व घटनायात कयाः सिरान टेक्नोलोजीं माफी फ्वनेधुंकूगु दु । डा. कोइरालां आः उगु कम्पनीं थःपिंसं ह्याक यानागु स्वीकार यायेधुंकाः कानुनी कारवाही न्ह्याकेमाःगु खँ धयातःगु दु ।

काठमाडौं प्रेसय् वःगु समाचारय् स्वास्थ्य मन्त्रालय मार्फत चीनं मेडिकल सामग्री न्यानाहःगु हःगु अनियमितताय् प्रधानमन्त्रीया सल्लाहकार अलीया लिसें उपप्रधानमन्त्री ईश्वर पोखरेलया काय व प्रधानमन्त्रीया प्रमुख राजनीतिक सल्लाहकार विष्णु रिमालया कायया संलग्नता दुगु खँ न्ह्यथनातःगु खः ।

थ्व घटनायात कयाः नेपाल पत्रकार महासंघ, अनलाइन पत्रकार संघ, सम्पादकतय् पुचः, नेपाली कांग्रेस लिसें थीथी नेतापिंसं दोषीयात कारवाही यायेमाःग माग यायेधुंकूगु दु । अनधिकृत रुपय् मेपिनिगु वेबसाइट हायेक याइम्ह मनू प्रधानमन्त्रीया सल्लाहकारय् तयातये मजिउगु खँ उमिसं धाःगु दु ।

सम्बन्धित बुखँ

LEAVE YOUR COMMENTS