
येँ – कोरोना भाइरस (कोभिड-१९)या कारणं विश्वन्यंक च्वनाच्वंपिं ९६म्ह नेपाःति सीगु दु ।
शनिवाः (मे १६ तारकि) तकया दुने विश्वया थीथी देशय् च्वनाच्वंपि ९६म्ह नेपाःमित सीगु व ७ हजार नेपाःमित कोरोनापाखें संक्रमित जूगु जानकारी गैरआवासीय नेपाली संघं (एनआरएनए) बिउगु दु । एनआरएनए अन्तर्गतया स्वास्थ्य समितिं मुंकूगु तथ्यांक कथं दकलय् अप्व बेलताय् ६३म्ह नेपाःमित सीगु जानकारी समितिया संयोजक डा. सञ्जीव सापकोटां बियादिल ।
अथेहे अमेरिकाय् १५म्ह, संयुक्त अरब इमिरेट्सय् ९म्ह, साउदी अरबय् २म्ह, आयरल्याण्ड, जापान, टर्की, नेदरल्याण्ड, बहराइन, स्वीडेन व नेपालय् छम्ह-छम्ह सीगु दु । सीपी मध्येय् ७७म्ह मिजं व १९म्ह मिसा खः ।
थ्व हप्ताय् बेलायतय् १२म्ह, संयुक्त अरब इमिरेट्सय् ३म्ह, साउदी अरबय् २म्ह व नेपालय् १म्ह यानाः थप १८म्ह सीगु खँ समितिं न्ह्यथंगु दु ।
कोरोनापाखें संक्रमित जूपिं धाःसा ७ हजार थ्यंगु दु । उकी मध्ये दकलय् अप्व अमेरिकाय् ५३ प्रतिशत दुसा युरोपय् १९, एशियाय् ५ व अष्ट्रेलियाय् थ्यंमथ्यं १ प्रतिशत कोरोनाया संक्रमण खनेदुगु दु । संक्रमितत मध्ये ३५ प्रतिशत नेपाःमितय् कोरोनापाखें मुक्त जुइधुंकूगु दु ।
LEAVE YOUR COMMENTS