ने. सं. ११४३ तछलाथ्व दशमी -

स्वांयाःपुन्हिया लसताय् लुम्बिनी विशेष ज्याझ्वः

येँ- बुद्ध जन्मस्थल लुम्बिनीइ २५६५ क्वःगु स्वांयाःपुन्हिया लसताय् विशेष ज्याझ्वः जुल । लुम्बिनी विकास कोषया ग्वसालय् शान्ति नायक भगवान बुद्धया जन्मस्थल लुम्बिनीइ स्वांयाःपुन्हिया लसताय् विशेष ज्याझ्वः याःगु खः ।

भगवान बुद्धया जन्म, संबोधि ज्ञान प्राप्त व महापरिनिर्वाण प्राप्त याना बिज्याःगु त्रिसंयोग चूलाःगु २५६५ क्वःगु स्वांयाःपुन्हिया लसताय् जूगु विशेष ज्याझ्वलय् लुम्बिनी प्रदेशया मुख्यमन्त्री शंकर पोखरेल मूपाहांकथं झायादीगु खः ।
अखिल नेपाल भिक्षु महासंघया अध्यक्ष श्रद्देय भिक्षु मैत्री महास्थविरया नेतृत्वय् लुम्बिनीस्थित थाई विहार प्रमुख भिक्षे सुपोथ, भियतनाम विहार प्रमुख भिक्षु डा. लाहम, लुम्बिनीया थीथी विहार, गुम्बाया धर्मगुरु, प्रतिनिधिपिंसं थःथःगु धर्म संस्कृतिकथं पुजा पाठ याना बिज्याःगु खः ।

लुम्बिनीया मुख्य आकर्षणया केन्द्र मायादेवी देगः न्ह्यःने जूगु धर्म सभाय् थेरवाद, वज्रयान व महायान समुदायपाखें नं पाठ याःगु खः । कोषया उपाध्यक्ष भिक्षु मैत्तेयं सुभाय् देछाना बिज्याःगु ज्याझ्वलय् कोषया सदस्य सचिव सानुराजा शाक्यं नं नुगःखँ तयादीगु खः ।
थुकथं हे २५६५ क्वःगु स्वांयाः पुन्हिया लसताय् लुम्बिनी उद्यानय् थीथीकथंया स्वां सिमा पीगु ज्या नं याःगु दु । मुख्यमन्त्री पोखरेलं वृक्षारोपण शुरु यानादीगु खःसा उपस्थित मेमेपिंसं नं थीथी प्रजातिया स्वां, सिसाबुसा वृक्षारोपण यानादीगु खः ।

देय्न्यंकंया प्रमुख बौद्ध धार्मिकस्थल नापं विहार, चैत्य, गुम्बाय् लगायतया थासय् वृहत रुपं थीथी ज्याझ्वः यानाः स्वांयाःपुन्हि हनेगु याना वयाच्वंगु खःसां कोरोना महामारीया कारणं थुगुसी नं स्वांयाःपुन्हिया ज्याझ्वः औपचारिकताय् जक सीमित जुल ।