ने. सं. ११४३ तछलाथ्व दशमी -

छवाः दुने मतपत्र थ्यंकेफु, सफू धाःसा थ्यंके मफु

येँ – नकतिनि क्वचाःगु स्थानीय चुनावया इलय् जनक शिक्षा सामग्रीइ छापे याःगु मतपत्र छुं न्हिया दुने हे देय्न्यंकं थ्यंगु खबर वयेवं सामाजिक सञ्जालय् चर्चा जूगु खः– ‘मतपत्र थ्यंकेफु, सफू थ्यंके मफु’ । सरकारं मतपत्र धाःसा छवाःया दुने हे देय्न्यंकं थ्यंकेफु तर विद्यार्थी मस्तय्सं ब्वनेमाःगु सफू धाःसा लांलां तक नं जिल्लाय् मथ्यनीगु खँयात कयाः अज्याःगु चर्चा जूगु खः ।

धाः गथे अथे हे आः नं स्कुलय् ब्वनेज्या शुरु जुइधुंकूसां सफू धाःसा थ्यंके फयाच्वंगु मदुनि । थुगुसी ला झन् दुर्गम जक मखु सुगम जिल्लाय् तकं सफू मथ्यंनिगु खँ धाःगु दु ।

जनक शिक्षा सामग्री केन्द्रया अधिकारीतय्सं धाःसा इलय् सफू थ्यंके मफुगुया दोष स्थानीय तहया निर्वाचन व रुस–युक्रेन दथुइ जुयाच्वंगु युद्धयात बिउगु धाःगु दु । केन्द्रया पदाधिकारीतय्सं म्हिगः प्रतिनिधिसभाया शिक्षा तथा स्वास्थ्य समितिया बैठकय् स्थानीय चुनावया मतपत्र छापे यायेमाःगु व रुस–युक्रेन युद्धया कारणं भ्वं थ्यंकः मवःगु जुयाः विद्यार्थीतय् सफू छापे याये मफुगु खः धकाः दावी याःगु खः ।

केन्द्रया प्रबन्ध निर्देशक अनिलकुमार झां बैठकय् धयादिल, ‘वंगु चैत १० गते तक वयेमाःगु भ्वं नकतिनि थ्यंकः वल । बजारय् भ्वंया अभाव जुयाच्वंगु दु, आः असारया न्हापांगु वालय् तक सफू छापे यायेगु ज्या क्वचाइ । वयां लछि दुने हे विद्यार्थीया ल्हातय् सफू थ्यंकेगु जुइ ।’
प्रबन्ध निर्देशक झाया कथं फुक्कं यानाः कुल २ करोड पाः सफू छापे यायेमाःगुली आः तकया दुने ३५ लाख जक छापे याये ल्यं दनि । छापे जुइधुंकूगु सफू जेठ ९ गतेनिसें देय्न्यंकया डिपोय् इनेधुंकूगु दु । तर पिने छ्वया धाःगु दुसां सफू धाःसा येँय् तकं न्याये मदयाच्वंगु अभिभावकपिनि धापू दु ।

वय्कलं आः छापे याये ल्यं दनिगु सफू प्रज्ञा प्रतिष्ठानया छापाखानाय् नं छापे यायेत्यनागु जानकारी बियादिल । केन्द्रयात प्यंगूनिसें झिगू तगिं तक सफू छापे यायेगु जिम्मा बियातःगु दु । उकी मध्ये न्यागू, खुगू व च्यागू तगिंया सफू बजारय् अभाव जुयाच्वंगु दु । थ्वहे झ्वलय् समितिं लछिया दुने फुक्कं सफू छापे यायेगु ज्या क्वचायेकेत सरकारयात निर्देशन बिउगु दु ।