ने. सं. ११४४ कौलाथ्व पारू - नःलास्वनेगु

शाह जुजुपिनि सम्पत्ति लिजय्

येँ – यती समूहयात थीथी लागाया सरकारी छ्यले बिल धकाः विवाद पिहां वयाच्वंगु हे इलय् शाहवंशीय जुजुपिनि सम्पत्तियात व्यापारिक प्रयोजनया लागिं लिजय् बिया वनेगु निर्णय नेपाल ट्रष्टं याःगु दु । पुलांम्ह जुजु वीरेन्द्र शाहलिसे स्वापू दुगु सम्पत्ति फुक्क मालाः राष्ट्रियकरण याना यंकेगु लागिं सरकारं नेपाल ट्रष्ट गठन याःगु खः । आः थ्व नेपाल ट्रष्टं पुलांम्ह जुजुपिंसं नारायणघाटया जंगल दुने दयेकातःगु दियालो बंगला व पोखराय् फेवाताल नापसं दयेकातःगु रत्न मन्दिर समेत ध्यबा कयाः बालं बीगु निर्णय याःगु दु ।

पोखराया रत्न मन्दिर बालं बीगु लागिं अन आवश्यक मर्मतया ज्या नं यायेधुंकूगु दुसा आः याकनं हे बालं बीगु ज्या न्ह्याइगु खँ नेपाल ट्रष्ट सूत्रं धाःगु दु । पोखराया स्थानीय मनूतय्सं धाःसा रत्न मन्दिरयात बालं बीगु ज्या मयायेत इनाप याना वयाच्वंगु दु । नारायणघाटया दियालो बंगला व पोखराया रत्न मन्दिर निगुलिं तत्कालीन जुजुपिनि न्ह्यइपुकेगु लागिं दयेकातःगु भवन खः । थ्व बाहेक कमलादी, थानकोट व महाराजगंजय् निर्मल निवास न्ह्यःने च्वंगु जग्गा नं सरकारं याकनं हे लिजय् बीगु तयारी यानाच्वंगु खँ धाःगु दु ।

अथे हे नेपाल ट्रष्टं पुलांपिं जुजुपिं च्वनीगु नारायणहिति दरवारया छगू भाग नं लिजय् बियाः होटल सञ्चालन याकेगु तयारी यानाच्वंगु दु । सरकारया थ्व निर्णय नं विवादय् लानाच्वंगु दु । पुलांपिं जुजुपिनि सम्पत्ति थथे लिजय् बीगु धकाः सरकारं तयारी याःसां उकियात गय् यानाः व छु माप–दण्ड कथं लिजय् बीगु धइगु छुं तयारी मदुगु जुयाः उकियात कयाः धकाः विवाद जुइ फइगु खँ धाःगु दु । नेपाल ट्रष्टं धाःसा छु छु थाय्या जग्गा गुलि गुलि ध्यबां लिजय् बीगु धकाः निर्णय यायेधुन कि उकी हे प्रतिस्पर्धा याःसा समस्या मवइगु खँ धाःगु दु ।

गोकर्णय् अझ जग्गा दनि
नेपाल ट्रष्टया नामय् लानाच्वंगु गोकर्णया जग्गा यती समूहयात हानं मेगु ३० दँया लागिं लिजय् बीगु धकाः सरकारं याःगु निर्णया विरोध जुयाच्वंगु इलय् नेपाल ट्रष्टं अनं अझ मेगु १२०० रोपनी जग्गा दनिगु व थ्व नं आः याकनं हे लिजं बीगु तयारी जुयाच्वंगु खँ धाःगु दु । यती समूहयात जग्गा बिउगु विषयय् सञ्चार माध्यमय् यक्व विवाद वयेवं प्रधानमन्त्रीपाखें समेत उकियात बचाउ यानादीगु दु । अनया जग्गा लिजं बीगु ज्याय् प्रधानमन्त्रीं समेत भ्रष्टाचार याःगु द्वपं वयाच्वंगु दु । नेपाल पर्वतीय पर्यटन संघं धाःसा यतीया बचाउ यासें थुकिं नेपाल भ्रमण दँ प्रभावित जुइ फइगु ख्याच्वः बिउगु दु ।