विपेन्द्र महर्जन मंत

येँ – ज्यापु महागुथिया न्हापांम्ह नायः लिसें च्वमि विपेन्द्र महर्जन मंत । वय्कः म्हीग बहनी ७ः३० बजे ८२ दँया वैशय् मदुगु खः । वय्कःयात म्हिगः हे पशुपति आर्यघाटय् अन्त्येष्टि यायेधुंकूगु दु । वय्कलं इतिहास व नेवाः संस्कृति सम्बन्धी आपालं च्वसुत च्वयादीगु दु । वय्कःया छगू बाखं सफूया लिसें ‘नेवाः व नेपाः’ नांया सफू पिहां वयाच्वंगु दु ।

मदुम्ह महर्जन लुम्बिनीइ दयेकूगु पलेस्वां पुखू निर्माण समितिया कार्यवाहक अध्यक्ष नं खःसा नेपालय् बौद्ध जागरण हयेगु निंतिं नं वय्कलं आपालं योगदान यानादीगु दु । अन्त्येष्टिया झ्वलय् वय्कःया सीम्हय् ज्यापु महागुथिं थःगु संस्थाया ध्वाँय् फायेकूगु खः । मदुम्ह महर्जनया जहान लिसें स्वम्ह काय व छम्ह म्ह्याय् दी ।