बौद्ध न्ह्यसः लिसः कासा व हिदान ज्याझ्वः

येँ(नेपालभाषा टाइम्स)÷बु.सं. २५६३ क्वःगु स्वांयाःपुन्हिया लसताय् बौद्ध न्ह्यसः लिसः कासा व हिदान ज्याझ्वः जुल । अन्तर्राष्ट्रिय बौद्ध समाजया ग्वसालय् रुपन्देही जिल्लाव्यापी रनिङ शिल्ड बौद्ध न्ह्यसः लिसः कासा रजत जयन्तीया रुपय् जूगु खः ।
कासाया उलेज्या लुम्बिनी सांस्कृतिक नगरपालिकाया प्रमुख मनमोहन चौधरीं त्वाःदेवाय् मत च्याकाः यानादीगु खः । झिंगुंगू ब्वनेकुथिं ब्वति काःगु कासाया लिपांगु चरणय् न्यागू ब्वनेकुथिया दथुइ धेंधेंबल्लाः जूगु खः ।
कासाय् न्हाप लाःगु मेत्रा गुरुकुलयात लक्ष्मी विद्या पदकलिसें ५,५५५÷–, निगूगु मसिना मा.वि.यात मंगला विद्या पदकलिसें ३,३३३÷–, स्वंगूगु मधुवनी मा.वि.यात ऋषिकेश विद्या पदकलिसें २,२२२÷– व आमा मा.वि.यात ओम विद्या पदकलिसें १,१००÷ तका दां व दसिपौ मूपाहां नगर प्रमुख चौधरीं लःल्हानादिल ।
निन्हुयंकं जूगु कासाया निर्णायक मण्डलय् भिक्षु पियरत्न, प्रधानाध्यापक फणिन्द्रकुमार पाल, समाजया सदस्य सचिव डा. नरेन्द्रकुमार मल्लिक च्वनादीगु खः । न्ह्यसः लिसः कासाया संयोजन व न्ह्यः व्यवस्थापन राजभक्त श्रेष्ठं यानादीगु खःसा खडानन्द शर्मा व हिमबहादुर केसी क्वीज माष्टर, डा. ज्ञानप्रकाश श्रीवास्तव स्कोर, पुजा यादव टाइम कीपरय् च्वनादीगु खः ।
ज्याझ्वलय् प्रमुख चौधरीं समाजपाखें न्ह्याका वयाच्वंगु न्ह्यसः लिसः कासा नीन्यादँ पूवंगु लसताय् जूगु ज्याझ्वलय् ग्वाहालि यानादीपिंत सुभाय् पौ नं लःल्हानादीगु खः ।
भिक्षु पियरत्नया सभापतित्वय् समाजया सदस्य सचिव मल्लिकं लसकुस यानादीगु जूगु ज्याझ्वलय् कासाय् उपेन्द्र अधिकारी, विरेन्द्रकुमार श्रेष्ठ, पदम चौधरी, ललामणि शर्मा व काजीरत्न शाक्यं सिरपाःया प्रयोजन यानादीगु खः ।
थ्व हे झ्वलय् समाजया हे ग्वसालय् छगू हिदान ज्याझ्वः नं जुल । समाजया थःगु हे निःशुल्क स्वास्थ्य प्रतीक्षालयय् जूगु हिदान ज्याझ्वलय् स्वीम्हेसिनं हिदान यानादीगु खः ।
उखे समाजया निंतिं दत्तचित्त जुयाः ग्वाहालि याना वयाच्वनादीम्ह फ्रान्सया डा. ब्राइट क्लाउड मदुगु दुःखय् समाजं विचाः हायेकूगु दु । लुम्बिनी एशोसियसन फ्रान्सया प्राविधिक सहयोगया अध्यक्षलिसें समाजया निःशुल्क स्वास्थ्य सेवाय् संलग्न जुयाच्वनादीम्ह डा. क्लाउड हालय् नगरकोट भ्रमणय् वनेगु झ्वलय् मदुगु खः ।

सम्बन्धित बुखँ

LEAVE YOUR COMMENTS