मन्त्रिपरिषद व सांसदपिनिगु मोहनि भत्ता कोरोणा कोषय्

येँ (नेपालभाषा टाइम्स) – सरकारं संघीय सांसदपिंत मोहनि भत्ता बीगु ज्यायात कयाः सामाजिक सञ्जालय् व्यापाक विरोध जुइवं अन्ततः उगु ध्यबा कोरोना कोषय् छ्वयेत तयारी सरकारं याःगु दु ।

म्हिगः च्वंगु मन्त्रिपरिषद बैठकं उगु निर्णय याःगु खँ सरकारया प्रवक्ता लिसे सञ्चारमन्त्री पार्वत गुरुङं पत्रकार सम्मेलनय् धयादीगु खः । प्रवक्ता गुरुङया कथं प्रधानमन्त्री व मन्त्रीतय् मोहनि भत्ता नं कोरोना कोषय् छ्वयेगु खँ धयादीगु खः । लिसे वय्कलं प्रदेश व स्थानीय तहया पदाधिकारीपिंत नं मोहनि भत्ता कोरोना कोषय् जम्मा यायेत नं इनाप यानादीगु दु। सरकारं वंगु छुं न्हिं न्ह्यः जक सांसदपिंत मोहनि भत्ता बीगु निर्णय याःगु खःसा सांसद सचिवालयं सांसदपिनिगु भत्ता बैंक खाताय् छ्वःगु खः । तर उकियात कयाः व्यापक विरोध सरकारं उगु निर्णय याःगु खः । थ्व स्वयां न्ह्यः नेकपाया छुं सांसदपिंसं सांसदपिंत महामारीया इलय् मोहनि भत्ता कायेगु उचित मजूगु धासें थःपिंत वःगु मोहनि भत्ता लित बीगु धासें वक्तव्य तकं जारी याःगु दु ।

उकथं हे नेपाली कांग्रेसं म्हिगः हे सांसदपिनिगु मोहनि भत्ता कोरोना कोषय् छ्वयेगु खँ धाःगु खः । कांग्रेसया सभापति शेरबहादुर देउवां म्हिगः थः सांसदपिंत भत्ता लित बीत निर्देशन बियादीगु खः । म्हिगः हे कांग्रेसया मू सचेतक बालकृष्ण खाँणं छगू वक्तव्य जारी यासें सरकारं सांसदपिंत बिउगु मोहनि भत्ता लित बीगु खँ धयादीगु दु। वय्कलं वक्तव्यय् धयातःगु दु, ‘कोरोना भाइरसया कारणं ब्वलंगु महामारीइ नेपाःमि जनता, रोग, भोग, पीड, अभाव फयाच्वंगु इलय् जनप्रतिनिधिपिंत मोहनि भत्ता बीगु सरकारया निर्णय सान्दर्भिक मजू ।’