नायः दावी मयायेगु घोषणा
येँ – हलिं नेवाः दबूया निवर्तमान न्वकु दयारत्न शाक्यं अध्यक्ष पदय् दावी मयाइगु जूगु दु । थनिं न्याला न्ह्यः येँय् जूगु दबूया तःमुँज्यां नायः पदय् सिजन श्रेष्ठ व वय्कःया दथुइ दत्या÷दत्या नायः जुइगु सहमति जूगु खः । सहमति कथं सिजन श्रेष्ठ न्हापां नायः जुयादीगु खःसा वयां लिपा दया शाक्य नायः जुइमाःगु खः ।
तर भाजु शाक्यं व स्वयां न्ह्यः हे छगू वक्तव्य पिकासें थः नायः मजुइगु जानकारी यानादीगु खः । वय्कलं निकट भविष्यय् थःगु परिवार व व्यवसायय् वइगु व्यस्तताया कारणं नायः पदय् च्वनाः ज्या याये फइगु सम्भावना मदुगु जुयाः नायः जुइ मफइगु खँ वक्तव्यय् न्ह्यथनादीगु दु ।
थम्हं नायः पदय् दावी मयायेगु जूगु कारणं आः वर्तमान नायः सिजन श्रेष्ठं हे निर्धक्क जुयाः पूर्ण कार्यकाल नायः जुयाः ज्या याना वनेगु लुखा चालीगु विश्वसा थम्हं कयागु खँ नं वय्कलं धयादीगु दु ।न्याला न्ह्यः येँय् जूगु दबूया तःमुँज्याय् निम्हं दुजःतय्सं अध्यक्ष पदय् दावी यायेवं मनमुताव ब्वलनी धकाः निम्हेसिया दथुइ दत्या÷दत्या नायः जुयाः दबू न्ह्याकेगु सहमति जूगु खः ।
थ्वहे झ्वलय् भाजु दया शाक्यं नायः पदय् दावी याये मखुत धकाः वक्तव्य मार्फत जानकारी यानादीसां उकिया आधिकारिक जानकारी हलिं नेवाः दबूयात धाःसा मवःनिगु खँ धाःगु दु ।
दबूया नायः भाजु सिजन श्रेष्ठयात थुकिया बारे प्रतिक्रिया फ्वनाबलय् वय्कलं शाक्यया थ्व धापू आः तक केन्द्रीय समितिइ मवःनिगु जुयाः छुं प्रतिक्रिया बी मछिंनिगु खँ कनादीगु दु । दबूयात थुकिया आधिकारिक जानकारी मवःतले वय्कःया ‘राजीनामा’ स्वीकार यायेत तकं समस्या जुइगु खँ नं नायः श्रेष्ठं कनादिल ।
LEAVE YOUR COMMENTS