साउननिसें येँ मनपा दुने पार्किङय् ध्यबा पुलेमालीगु

येँ – येँ महानगर दुने वइगु आर्थिक दँ निसें पार्किङ यायेबलय् ध्यबा पुलेमालीगु जूगु दु । येँ महानगरपालिकां आइतवाः बजेट न्ह्यब्वसें पार्किङ शुल्क म्हयेगु खँ धाःगु दु । पार्किङया ध्यबा कायेगु निंतिं थीथी थाय्सा बर्गीकरण यानाः थाय् स्वयाः ध्यबा कायेत्यंगु खः । थुकिया निंतिं येँ महानगरपालिकां पार्किङ दर रेट नं क्वःछी धुंकूगु दु ।

महानगरं बर्गीकरण याः कथं क्षेत्र नं १ य् मोटरसाइकल स्कुटर पार्किङ यायेबलय् घन्टाया झिंन्यातका पुलेमालीसा प्यचाः घःचाःया गाडीया निंतिं घौछिया पीतका भाः तयातःगु दु । अथेहे प्यचाः घःचाः स्वयां तग्वःगु गाडीया जुल धाःसा घौछिया १२० तका पुलेमाली । अथेहे क्षेत्र नं. २ लय् पार्किङ यायेबलय् मोटरसाइकलया घौछिया २५ तका पुलेमालीसा, प्यचाः घःचाःया गाडीइ घौछिया ८० तका पुलेमाली, अलेहे प्यचाः घःचाः स्वयां तग्वःगु गाडीया निंतिं घौछिया स्वसः तका पुलेमाली ।

थ्व क्षेत्रय् न्यूरोड, धर्मपथ, कान्तिपथ, दरवारमार्ग थेंज्याःगु थाय् लाः । अथेहे क्षेत्र नं. ३ य् नं मोटरसाइकलया झिंन्यातका, प्यचाः घःचाःया गाडीया ४० तका व व स्वयां तग्वःगु गाडीया सछिया तका शुल्क पुलेमाली । क्षेत्र नं. ३ य् बिजुली बजार, मनोहरा ताँ, पेप्सीकोला, पुतलीसतक, बागबजार आदि थाय् लाः । येँ मनपां न्हापां निसें न्ह्यथने लाःथाय् पार्किङ याइपिंत ज्वन धाःसा द्वःछि दां जरिवाना पुइकेगु यानाच्वंगु दु ।