
येँ – नेपाल कम्युनिष्ट पार्टी (मालें) नेपाःया कम्युनिष्ट आन्दोलनया न्हापांम्हनापं नेपाल कम्युनिष्ट पार्टीया संस्थापकमध्ये छम्ह नेता शम्भुराम श्रेष्ठया झिंस्वक्वःगु पुण्य तिथिइ स्मृति दिवस हंगु दु । पार्टीया थःगु हे ज्याकुथिइ जूगु ज्याझ्वलय् नेकपा (माले)या महासचिव सीपी मैनालीं मदुम्ह नेता श्रेष्ठ छम्ह सच्चा राष्ट्रवादी कम्युनिष्ट नेता खः धासें वय्कःया दूरदर्शी विचाः दक्वं थौंया इलय् वयाः अतिकं सान्दर्भिक जूगु विचाः तयादीगु खः ।
‘नेता श्रेष्ठया उच्च विचाः जनसमक्ष हयेमाःगु अतिकं आवश्यक जू’ वय्कलं धयादिल, ‘आः नेता शम्भुरामया नामं प्रतिष्ठान चायेकेगु निंतिं कुतः जुइत्यंगु दु ।’पार्टीया जिल्ला कमिटीया दुजः उपेन्द्र काफ्लें लसकुस न्वचु बियादिसें नेता श्रेष्ठया स्मृति दिवस हने हःगु धइगु हे भाग्यया खँ खः धयादिल ।
ने.क.पा. माओवादीया नेता सूर्यबहादुर नकःमिं छम्ह सच्चा कम्युनिष्ट नेतायाके दयेमाःगु गुण आतक थम्हं शम्भुरामयाके हे जक खना धासें उगु इलय् वय्कःयात दरवार लगायत थीथी थासं आपालं प्रलोभन क्यनेगु ज्या जूसां थःगु अडान प्रति दृढ जुयाच्वनादीम्ह छम्ह सच्चा कम्युनिष्ट नेताया उदाहरण बियादीगु धयादिल ।
कम्युनिष्ट लिगया केन्द्रीय दुजः केशवकृष्ण श्रेष्ठं नेता श्रेष्ठया भाषण निक्वः स्वक्वः न्यना बलय् थः प्रभावित जूगु खँ लुमंकादिल । नेकपा (माओवादी) वैद्यया केन्द्रीय दुजः गोर्की श्रेष्ठं थः मचांनिसें हे शम्भुराम श्रेष्ठया छेँजःथें हे नापनापं जुयाः राजनीतिक छत्रछायाँय् ब्वलंगु खः धयादिल ।
संघीय समाजवादी फोरमया केन्द्रीय दुजः के.बीं घःजुं शम्भुराम श्रेष्ठं अबलय् सुयातं नं दुःख जुल धाःसा सकलें कम्युनिष्ट पासापिं जानाः ग्वाहालि यायेगु चलन दयेकादीगु खँ कनादिल । नेता श्रेष्ठया छेँजःपाखें वय्कःया म्ह्याय् मधु श्रेष्ठं देखावटी व प्रचार प्रसारय् विश्वास मयाइम्ह थः अबुं अबलय् अन्तर्वार्ताया निंतिं टेलिभिजनत वःसां नं अन्तर्वार्ता बीत अस्वीकार यासें छ्वयाबीगुलिं थौंया न्हूपुस्तां वय्कःयात म्हसीके मफयाच्वंगु धयादिल ।
ज्याझ्वःया सभापतिया थासं नेकपा (माले)या केन्द्रीय दुजः सिद्धिलाल महर्जनं शम्भुरामया विचाः व सिद्धान्तयात अंगिकार यानाः क्रान्ति याना वने फत धाःसा सार्थकता काइगु विचाः तयादिल ।
LEAVE YOUR COMMENTS