विश्व रेडक्रस व रेडक्रिसेन्ट दिवस हन

येँ – नेपाल रेडक्रस सोसाइटी (नेरेसों) विश्व रेडक्रस दिवस व रेडक्रिसेन्ट दिवस छगू ज्याझ्वः यासें हन । रेडक्रसया संस्थापक जाँ हेनरी ड्युनाया १९१ क्वःगु जन्मजयन्तीय लसताय् लाकाः वंगु मई ८ तारिखकुन्हु उगु दिवस हंगु खः । मानवीय सन्देश न्यंकेगु व प्रेममय भावना विकास यायेगु ल्याखं ‘माया’ धइगु नारा बियाः नेरेसोया केन्द्रीय ज्याकूनिसें जिल्लाय् तकं थीथी गतिविधिलिसें दिवस हंगु खः ।

केन्द्रीय ज्याकुथिइ जूगु ज्याझ्वलय् रेडक्रसया अन्तर्राष्ट्रिय महासंघया नेपाः प्रमुख जुजा किम, केन्द्रीय अध्यक्ष संजीव थापा, रेडक्रसया अन्तर्राष्ट्रिय समन्वय समितिया प्रमुख प्रमेश पौडेलं मंकाःकथं रेडक्रसया ध्वाँय् झण्डोत्तोलन यानाः ज्याझ्वः औपचारिक रुपं शुरु यानादीगु खः ।

उगु इलय् केन्द्रीय अध्यक्ष थापां नेपाःया दुर्गम गांनिसें कयाः आधुनिक समुदाययात नं रेडक्रसया स्वयमसेवकं सेवा बिया वयाच्वंगु व स्थानीय आवश्यकताया लिधंसाय् सेवा प्रवाह याना वयाच्वंगु जानकारी बियादिल ।

महामन्त्री देवरत्न धाख्वां थःगु ई व विशेषतालिसें देय्न्यंकं सेवा बिया वयाच्वंपिं रेडक्रसकर्मितय्त सुभाय् बीत व इमि दथुइ मतिना अप्वयेकेत अन्तर्राष्ट्रिय रेडक्रस अभियानया निकायत छगू हे थासय दनाच्वंगु दु धयादिल ।

संचार निर्देशक दिव्यराज पौडेलं रेडक्रसं विपद्या इलय् तत्कालीन उद्धार व राहत, रक्तसंचा, एम्बुलेनस सेवा, प्राथमिक उपचार, अत्यावश्यकीय सेवा नापं जीवन रक्षा, स्वास्थ्य प्रवद्र्धन, संरक्षण, लैंगिक समानता व समावेशीकरण थेंज्या क्षेत्रय् संचालन जुयाच्वंगु सेवापाखें दँय्दसं नीन्यागू लाखयात सेवा बिया वयाच्वनागु जानकारी बियादिल ।

उगु इलय् नेपाल रेडक्रसया साझेदार संस्था जापान रेडक्रसया प्रतिनिधि काजुयो इगारासि, रेडक्रस अन्तर्राष्ट्रि महासंघ प्रमुख जुजा किमं नं थःथःगु नुगःखँ तयादीगु खः ।